وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاند، ئەنجوومەنی وەزیرانی هەرێمی کوردستان ڕەزامەندی داوە، لەسەر کۆنووسی پێشنیازکراوی لێژنەی باڵای تایبەت بە ساخکردنەوە و بەبازاڕکردنی بەرهەمی گەنمی جووتیارانی هەرێمی کوردستان.
پاڵپشت بە ناوەڕۆکی کۆنووسەکە، ئەو بڕە گەنمەی لە هەرێمی کوردستان ماوەتەوە و لە چوارچێوەی پڕۆسەی وەرگرتنی گەنم لە سایلۆکان وەرنەگیراوە، لەلایەن دوو کۆمپانیای کەرتی تایبەت “خۆشناو و قەیران” وەردەگیرێت، بەو مەرجەی کە گەنمەکە ئەو تایبەتمەندییەی هەبێت کە عێراق دەستنیشانی کردووە.
وەزارەتی کشتوکاڵ ئاماژەی بەوە کردووە، هەر تۆنێکی گەنمی پلە یەک بە نرخی ٥٥٠ هەزار دینار و هەر تۆنێک گەنمی پلە دوو بە نرخی ٥٢٥ هەزار دینار وەردەگیرێت.
وەزارەتەکە لە ڕاگەیەندراوێکدا ئاماژەی بەوەش کردووە، کە پێویسته جووتیار پشتگیری بنکەی کشتوکاڵی و بڕی گەنمی وەرگیراوی لە سایلۆکان پێبێت و بڕی گەنمی وەرنەگیراویش تۆمار کرابێت.
بەپێی ڕاگەیەندراوەکە، پڕۆسەی وەرگرتنی گەنمەکە لە ماوەی (یەک مانگ)دا دەبێت کە لە ١٥ی تەمووزەوە دەست پێدەکات و شایستە داراییەکانی جووتیارانیش لە ماوەی (دوو مانگ) لە دوای ڕێککەوتی وەرگرتنی گەنمەکەوە دەدرێت.