جارێکی دیکە بە ڕێگەی درۆنی بۆمبڕێژکراو هێرش کرایەوە سەر کێڵگەی نەوتی تاوکێ لە سنووری زاخۆ و لە دوو شوێنی جیاوازی سەربە پارێزگای هەولێریش درۆنی بۆمبڕێژکراو کەوتنە خوارەوە.
دژەتیرۆری کوردستان، ڕایگەیاند، ئەمڕۆ پێنجشەم 17ی تەممووزی 2025، کاتژمێر 10:55، لە ڕێگەی درۆنێکی بۆمبڕێژکراوەوە جارێکی دیکە هێرش کرایە سەر کێڵگەی نەوتی DNO لە تاوکێ لە سنووری ئیدارەی سەربەخۆی زاخۆ.
بەگوێرەی ڕاگەیەندراوەکە، هیچ زیانێکی گیانی و ماددیی لێ نەکەوتووەتەوە.
هەر لە کاتژمێر 10:50 خوولەکی بەیانی ئەمڕۆ پێنجشەم، درۆنێکی بۆمبڕێژکراو لە نزیک گوندی سوورێژەی سەر بە ناحیەی شەمامکی پارێزگای هەولێر کەوتە خوارەوە و زیانی گیانی و ماددی لێ نەکەوتەوە.
هەردوو هێرشە درۆنییەکە، دوای ئەوە دێت، کە لە کاتژمێر 1:27 خوولەکی بەرەبەیانی ئەمڕۆیش، درۆنێکی بۆمبڕێژکراو لە نزیک گوندی جێژنیکانی سەر بە شارۆچکەی بەحرکەی پارێزگای هەولێر کەوتە خوارەوە.
لە سەرجەم حاڵەتەکانی ئەمڕۆدا، درۆنەکان زیانی گیانی و ماددییان نەگەیاند.