مەحموود محەمەد گوتەبێژى پارتی دیموکراتی کوردستان، لە ڕاگەیەنراوێکدا ئەمڕۆ پێنجشەم، ١٦ی نیسانی ٢٠٢٦ ئاماژەی دا: “سەبارەت بەو بارودۆخەى بۆ کەرکوک هاتۆتەپێش، ئێمە لە پارتى دیموکراتى کوردستان وەکو هەمیشە پاڵپشتى لە مافى پێکهاتەکانى عێراق و هەرێمى کوردستان دەکەین و بەو پەڕى ڕاشکاوییەوە ڕایدەگەیەنین کە سەقامگیرى و پێشکەوتنى وڵاتەکەمان بەندە بە دابینکردنى مافە ڕەواکانى تەواوى پێکهاتە نەتەوەیى و ئاینى و ئاینزاکان و، بڕواشمان وایە کەرکوک مەڵبەندى پێکەوەژیانى تەواوى پێکهاتەکانیەتى”.
ئەمڕۆ پێنجشەم، بەپێی ڕێککەوتنی یەکێتیی نیشتمانیی کوردستان و چەند لایەنێکی دیکەی عێراقی، پۆستی پارێزگاری کەرکووک ڕادەستی پێکهاتەی تورکمان کرا و ڕێبوار تەها پارێزگاری ئێستای شارەکە لە پشکی یەکێتی، نامەی دەستلەکارکێشانەوەی پێشکەش کرد و بڕیارە وەک جێگری پارێزگار دەست بەکاربێت.
گوتەبێژەکەی پارتی لە ڕاگەیەندراوەکەدا دەڵێ: “هەڵوێستى پارتیمان ڕوون و ئاشکرایە و دژى ئەو سەفەقاتانە بووین کە بەدەر لە نیازپاکى لە هۆتێل ڕەشید بەبێ بەشدارى لایەنە سیاسییەکانى کە نوێنەرایەتى خەڵکى خۆڕاگرى کەرکوکیان دەکرد، بەسەر ئەو شارە خۆشەویستەدا سەپێندران. ئەم بارودۆخەى ئێستاش لێکەوتە و درێژەپێدەرى ئەو سەفەقاتانەیە!”.
زیاتر دەڵێ: “ئێمە لە پارتى دیموکراتى کوردستان قوربانى زۆرمان لە پێناو کەرکوک وەکو نیشتمان و خەڵکە ئازیزەکەى داوە و، هەموو هەڵوێست و هەوڵەکانمان بۆ سەربەرزى و بەختەوەرییان بووە، بۆیە لەگەڵ ئەو بڕیار و ڕاسپاردانە دا دەبین کە بە هاوبەشى هەموو لایەنە سیاسییەکان و نوێنەرانى پێکهاتەکانەوە بدرێن”.