وەزارەتی ناوخۆی حکومەتی هەرێمی کوردستان، سەرلەبەری ئەو هەواڵ و دەنگۆیانەی ڕەت کردەوە کە لە بەشێک لە دەزگاکانی ڕاگەیاندندا بڵاوکراونەتەوە سەبارەت بە بوونی درۆن یان هێز و یەکەی سەربازیی ئۆکراینی لە خاکی هەرێمی کوردستاندا، و جەختی کردەوە کە ئەم بانگەشانە لە بنەڕەتدا ناڕاست و بێ‌بنەمان.
وەزارەتی ناوخۆ لە ڕاگەیەنراوێکدا کە ڕۆژی هەینی ٢٣ی تشرینی یەکەمی ٢٠٢٦ بڵاویکردەوە، ڕایگەیاند، هەڵوێستی بنەڕەتی و نەگۆڕی هەرێمی کوردستان هەمیشە پەیڕەوکردنی سیاسەتی بێلایەنی و خۆبەدوورگرتن بووە لە ناکۆکییە هەرێمی و نێودەوڵەتییەکان. هاوکات ئاماژەی بەوەش کرد کە هەرێمی کوردستان بە توندی هەر هەوڵێک بۆ بەکارهێنانی خاکەکەی وەک پێگەیەک بۆ جووڵەی سەربازی یان دوژمنکارانە دژ بە هەر وڵاتێک ڕەت دەکاتەوە.
لە کۆتایی ڕاگەیەنراوەکەدا، وەزارەتی ناوخۆ دووپاتی کردەوە کە پاراستنی ئاسایش و سەقامگیریی هەرێمی کوردستان لەپێشینەی کارەکانیانە، و بە هیچ شێوەیەک ڕێگە نادرێت هەرێم پەلکێشی ناو ئەو ململانێیانە بکرێت یان تێوەبگلێنرێت.