زێدپرێس
بڕیارە ئەمڕۆ پێنجشەم ٣ی ئابی ٢٠٢٣، پێشمەرگەکانی لیوای ٢٠ی هاوبەش لە شاری کەرکووک خۆپیشاندان ساز بکەن، وەک ناڕەزایەتی بەرانبەر دەستبەکارنەبوون و خەرج نەکردنی مووچەکانیان.
ئەمڕۆ پێنجشەم ٣ی ئابی ٢٠٢٣، یەکێک لە پێشمەرگەکانی لیوای ٢٠ی هاوبەش کە لە ڕێکخەرانی خۆپیشاندانەکەیە، بۆ زێدپرێس ڕای گەیاند، دواجار لە نێوان خۆمان بڕیارمانداوە لە کاتژمێر ٢:٠٠ی دوانیوەڕۆی ئەمڕۆ پێنجشەم لە بەردەم نووسینگەی د. شاخەوان عەبدوڵا جێگری سەرۆکی ئەنجوومەنی نوێنەرانی عێراق لە شاری کەرکووک دەست بە خۆپیشاندان و ناڕەزایەتی دەربڕین بکەین.
ڕوونی کردەوە، نزیکەی دوو ساڵە چاوەڕوانی دەستبەکاربوون دەکەن و هێشتا نە بۆ مەشق ناردراون و نە مووچەیەکیان بۆ خەرج کراوە، لەکاتێکدا لە بودجەی عێراق بۆ ساڵانی ٢٠٢٣ تا ٢٠٢٥ تەنانەت شایستە داراییەکانیشیان بۆ تەرخانکراوە.
ئەو گوتی، “نووسینگەی جێگری سەرۆکی ئەنجوومەنی نوێنەرانمان هەڵبژاردووە، لەبەر ئەوەی کوردە و خەڵکی کەرکووکە و لە ماوەی پێشتریشدا بەردەوام قسەی لەسەر کێشەکەمان کردووە، دەمانەوێت دەنگمان بگات و جگە لە بەڵێن، وەڵامێکی کرداری وەربگرینەوە”.
لیوای ٢٠ی پێشمەرگە، لە سێ هەزار و ٧٧٧ لە گەنجانی کەرکووک و گەرمیان و مووسڵ پێکهاتووە. پێش نزیکەی دوو ساڵ لەلایەن وەزارەتی پێشمەرگەوە نانووسکراون و بەپێی ڕێککەوتنی نێوان هەردوو حکوومەتی عێراق و هەرێمی کوردستان، لیوایەکە گواستراوەتەوە سەر وەزارەتی بەرگری عێراق و لە بودجەی پەسندکراوی عێراقیشدا بۆ ساڵانی ٢٠٢٣، ٢٠٢٤ و ٢٠٢٤، لە چوارچێوەی تەرخانکراوەکانی وەزارەتی بەرگری، بەشە بودجەی لیوای ٢٠ی پێشمەرگە جێگیر کراوە.
بەگوێرەی ناوەڕۆکی یاسای بودجەی سێ ساڵەی عێراق، لیوای ٢٠ی هاوبەش بە سێ هەزار و ٧٧٧ ئەندام جێگیر کراوە و بڕی ٦٥ ملیار و ٨٤٥ ملیۆن دیناریش وەک شایستەی دارایی لیوایەکە تەرخانکراوە، بەڵام هێشتا جێبەجێ نەکراوە.
تا ئێستا، لیوایەکە دەستبەکارنەبوون و هیچ مووچەکیشیان وەرنەگرتووە.
ئەوان پێشتر بۆ زێدپرێس دووپاتیان کردووەتەوە، کە ئامادەکارییان کردووە بۆ ئەوەی لە ڕۆژی یەکشەمەی داهاتووەوە، خۆپیشاندان و گردبوونەوەی ناڕەزایەتی لە بەردەم وەزارەتی پێشمەرگە لە هەولێر ڕێک بخەن.