زێدپرێس
حزبی شیوعی کوردستان سەبارەت بە دۆخی ئاڵۆزی کەرکووک ڕایدەگەیەنێت، ئەوەی هەیە، لە هەڵوێست لە بەرانبەر پارتی تێپەڕاندووە بۆ گرفت دروستکردن لە هاتوچۆی هاووڵاتیان و گەیاندنی خزمەتگوزارییەکان بۆیان و ڕێگری لە کاروکاسبی و پێداویستییەکانی ژیانیان.
دەقی ڕاگەیەنراوەکە:
نابێت لەوە زیاتر، ڕەوشی کەرکووک، ئاڵۆز و بێ چارەسەر بێت.
ماوەی ٥ ڕۆژە، کەسانی سەر بە حەشدی شەعبی بە بەرگی مەدەنییەوە، ڕێگای سەرەکی کەرکووک- هەولێریان داخستووە، لەژێر ناوی وەستانەوە بەرانبەر ئەو بڕیارەی سەرەکوەزیران بۆ گێڕانەوەی بارەگای سەرەکی و بارەگاکانی پارتی لە کەرکووک.
ئەم جموجۆڵەی چەند کەسە، لە هەڵوێست لە بەرانبەر پارتی تێپەڕاندووە بۆ گرفت دروستکردن لە هاتوچۆی هاووڵاتیان و گەیاندنی خزمەتگوزارییەکان بۆیان و ڕێگری لە کاروکاسبی و پێداویستییەکانی ژیانیان.
لەژێر ئەو فشارانەدا، بۆ شکاندنی ئەو گەمارۆیە، ئەمڕۆ شەممە ٢ی ئەیلول، هاووڵاتیانی ناوچە کوردییەکان لە ڕەحیماواوە بەرەو ناوچە کۆنتڕۆڵکراوەکە خۆپیشاندانیان بەڕێخست و لەئەنجامدا، هێزە ئەمنییەکان ڕووبەڕوویان بوونەوە و بە گوللە وەڵامدرانەوە و شەهید و بریندار هەیە.
ئێمە لە حزبی شیوعی کوردستان، نیگەرانین لە ئاڵۆزبوونی دۆخەکە و لە ڕۆڵی حکوومەتی عێراق و بەرپرسانی حکومی لە کەرکووک کە لە ماوەی چەند ڕۆژدا نەهاتن بەدەم چارەسەری گرفتەکەوە، کە بووە هۆی قوڵبوونەوە و ناڕەزایی زیاتر.
بارودۆخی کەرکووک پێویستی بە ئارامی و گفتوگۆی دیموکراسییانە و یەکتر قبوڵکردن و پەلەکردنە لە جێبەجێکردنی مادەی ١٤٠ی دەستوور و گەڕاندنەوەی ماف بۆ خاوەن ماف و پێکەوە ژیانە، بەپێچەوانەوەوە ئەمجۆرە هەوڵانەی پاشقول لەیەکگرتن، ڕەوشەکە ئاڵۆزتر دەکات و زیانی بۆ هەموو لایەک دەبێت و دڵخۆشکەری نەیارەکانمانە.
گوتەبێژی حزبی شیوعی کوردستان
٢ی ئەیلولی ٢٠٢٣