زێدپرێس
دەقی پەیامەکە:
بەناوی خوای بەخشندەی میهرەبان
لە ماوەی چەند ڕۆژی ڕابردوودا بەهۆی گرتنی ڕێگای کەرکووک-هەولێر، ژیان و هاتوچۆی هاووڵاتیان ئاستەنگ و پشێوی تێکەوت و نائارامی کەوتە ناو شاری کەرکووک، جێگە داخیشە هێزە ئەمنییەکان و پۆلیسی کەرکووک هیچ کاردانەوەیەکیان لە بەرانبەر داخستنی ڕێگای هەولێر-کەرکووک نەبوو. ئەو ڕێگەگرتن و نانەوەی پشێوی بووە هۆی ناڕەزایەتی و خۆپیشاندانی هاووڵاتیانی کوردی کەرکووک، کە بە داخەوە بە توندوتیژی و گولـله وەڵامدرانەوە و ژمارەیەک ڕۆڵەی کورد بوونە قوربانی و نیگەرانی لای هەموو لایەک دروستکردووە.
ئەوەی ئێستا دەگوزەرێ ئاماژەیەکی ترسناکە بۆ سەر ڕەوشی ئەمنی شارەکە و هاووڵاتیانی کورد بەتایبەتی، کار دەکاتە سەر پێکەوەژیانی برایانە و ئاستی پەیوەندی نێوان لایەنەکان.
چارەسەری کێشەکانی کەرکووک وەک شارێکی کوردستانی لە چوارچێوەی دەستوور و یاسا دیاریکراوە، ناکرێت لە پەنای ڕەوشی ناجێگیری شارەکە و ئەجێندای سیاسی چەند لایەنێک و دەستی دەرەکی و پاساوی نەخوازراو مامەڵە لەگەڵ کەرکووک و کەرکووکییەکان بکرێت و خوێنی ڕۆڵەکانی بەناهەق بڕژێت.
ئێمە لە یەکێتی زانایانی ئایینی ئیسلامی کوردستانەوە، وێڕای ئیدانەکردنی هێڕش و تەقەکردن لە هاووڵاتیان و شەهیدکردنی ڕۆڵەکانی کورد، بە هیچ شێوەیەک لەگەڵ ئەم جۆرە توندوتیژی و ئاژاوە تائیفییانە نین، کە ئامانجیەتی خۆسەپێنی و زەبر و هێز بکاتە سەنگی مەحەک، داوا لە حکوومەتی عێراق و لایەنی بەرپرس لە شارەکە دەکەین بەزووترین کات سنوورێک بۆ جیاکاری و خۆسەپاندن و هەوڵە شەڕئامێزەکان دابنێن و، بگەڕێنەوە بۆ بەرژەوەندیی خەڵکی کەرکووک و ڕێگەی گفتوگۆ و مەرجەعی یاسایی کە دەستوری هەمیشەیی عێراقە.
هەروەها داواش لە حزب و لایەنە کوردییەکان دەکەین لەپێناو دۆزی نەتەوەیی و چارەنووسی کەرکووک تەبا و یەک هەڵوێست بن و بەرژەوەندییە باڵاکان و هەستیاریی دۆخەکە لەبەرچاو بگرن.
هەروەک چاوەڕێ دەکەین لە زانایانی کورد و پێکهاتەکانی تر و تەواوی دامەزراوەی ئایینی لە کەرکووک کار لەسەر هێورکردنەوەی دۆخەکە بکەن و پەیامی برایەتی و تەبایی و بەرپرسانەی خۆیان بگەیەنن.
یەکێتی زانایانی ئایینی ئیسلامی کوردستان
٣ی ئەیلوولی ٢٠٢٣