زێدپرێس
بەڕێوەبەرایەتی نەهێشتنی ماددە هۆشبەرەکان دەستگیرکردنی دوو تۆمەتبار و دەستبەسەرداگرتنی ٥ کیلۆگرام ماددەی هۆشبەر لە جۆری کریستاڵ ڕادەگەیەنێت.
ئەمڕۆ سێشەم ٣ی تشرینی یەکەمی ٢٠٢٣، بەڕێوەبەرایەتی نەهێشتنی ماددە هۆشبەرەکان، ڕایگەیاند، دوای وەرگرتنی بڕیاری دادوەری لێکۆڵینەوەی ئاسایش، تیمەکانی بەڕێوەبەرایەتی نەهێشتنی ماددە هۆشبەرەکان، بەپلانێکی ورد و تۆکمە ٢ تۆمەتباری ماددە هۆشبەرەکانیان دەستگیر کردووە.
“تۆمەتبارەکان خەڵکی شارۆچکەی قەڵادزێن”، بەڕێوەبەرایەتییەکە وا دەڵێت.
ئاشکرای کرد، “لەکاتی دەستگیرکردنیان بڕی ٥ کیلۆگرام ماددەی هۆشبەر لە جۆری کریستاڵیان پێگیرا، کە نیازیان وابوو بۆ ناو شاری هەولێر بیگوازنەوە”. بەگوێرەی بەڕێوەبەرایەتی نەهێشتنی ماددە هۆشبەرەکان، پەڕاوی لێکۆڵینەوە بۆ هەردوو تۆمەتبار کراوەتەوە و بەگوێرەی یاسای بەرەنگاربوونەوەی ماددە هۆشبەرەکان و کارتێکەرە ئەقڵییەکان رووبەرووی یاسا دەکرێنەوە.