زێدپرێس
ئەمڕۆ سێشەم، ١٩ی کانوونی یەکەمی ٢٠٢٣، وەزارەتی کارەبای حکوومەتی هەرێمی کوردستان ڕایگەیاند، کەمال محەمەد وەزیری کارەبا سەرپەرشتی کۆبوونەوەیەکی ئاسایی وەزارەتەکەی کردووە و لە کۆبوونەوەکەدا تاوتوێی چەند پرسێکی تایبەت بە کارەبا کراوە.
بەپێی ڕاگەیەندراوەکە، لە کۆبوونەوەکەدا بریکار و ڕاوێژکاران و بەڕێوەبەرانی گشتیی کارەبای پارێزگاکان ئامادەبوون، بڕیار لەسەر جێبەجێکردنی یەکسانی لە دابەشکردنی کارەبا لەنێوان پارێزگاکان دراوە.
وەزارەتەکە ئاماژەی بەوە کرد، تەوەرێکی دیکەی کۆبوونەوەکە “تایبەت بوو بە لێژنەی پێوەری زیرەک و چاودێری و بەدواداچوونی سەرپێچییەکان و بڕیار درا ھەڵمەتێکی فرەوان بۆ نەھێشتنی سەرپێچییەکان و سزادانی ئەو کەسانە بکرێت کە لە دەرەوەی پێوەری زیرەک کارەبای ڕاکێشاوە و شوێنەکانیان ئاشکرایە”.
ھەر لەو کۆبوونەوەیەدا، بڕیاری کەمکردنەوەی کارەبا بەردەوامەکان درا. مەبەست لەوەش ئەوەیە، ئەو شوێنانەی کارەبای ٢٤ کاتژمێرییان هەیە، بەتایبەت شار و سیتییەکان، چیتر کارەبای بەردەوامیان نامێنێت.
زیاتر دەڵێ، “وەزارەتی کارەبا توانای بەرھەمھێنانی کارەبای بۆ ٣٤٠٠ مێگاوات بەرز کردووتەوە، لەکاتێکدا خواست لەسەر کارەبا بۆ سەرووی ٦٠٠٠ مێگاوات کارەبا بەرز بووەتەوە”.