ئه‌نجوومه‌نی وه‌زیرانی هەرێمی کوردستان بۆ تاوتوێکردنی پرسی مووچە و بودجە و هەناردەکردنەوەی نەوت کۆدەبێتەوە.
بڕیارە ئەمڕۆ چوارشەم، ٣١ی کانوونی دووەمی ٢٠٢٤، ئەنجوومەنی وەزیرانی هەرێمی کوردستان بە سەرپەرشتی مەسرور بارزانی سەرۆکی حکوومەتی هەرێم کۆببێتەوە و لە کۆبوونەوەکەشدا چەندین پرس و بابەتێک تاوتوێ دەکرێت.
بەپێی کارنامەی کۆبوونەوەکە، پوختەیەک لەبارەی سەردان و بەشداری شاندی حکوومەتی هەرێمی کوردستان بۆ کۆڕبەندی داڤۆس بە سەرۆکایەتی مەسرور بارزانی سەرۆکوەزیران، دەخرێتەڕوو.
تەوەرێکی دیکەی کۆبوونەوەکەی ئەنجوومەنی وەزیران تایبەت دەبێت بە تاوتوێکردنی ئەنجامەکانی گفتوگۆی نێوان حکوومەتی هەرێم و عێراق لەمەڕ مووچە و بودجە و پرسی هەناردەکردنەوەی نەوتی هەرێمی کوردستان.
هەروەها، بڕیارە لە هەمان کۆبوونەوەدا ئەنجوومەنی وەزیران دەنگ لەسەر ڕەشنووسی پڕۆژەیاسای کارکردنی کرێکارانی بیانی لە هەرێمی کوردستان بدات.