بەڕێوەبەرایەتیی کەمپی هۆل لە ڕۆژاڤای کوردستان (باکووری ڕۆژهەڵاتی سووریا)، کاروانێکی نوێی خێزانە عێراقییەکانی نیشتەجێی کەمپەکەی، بۆ ناوخۆی عێراق ناردەوە کە لە کەمپی جەدعە نیشتەجێ دەکرێن.
پڕۆسەکە، ڕاستەوخۆ لەلایەن هاوپەیمانی نێودەوڵەتی و بە هەماهەنگی ئیداری خۆسەری باکوور و ڕۆژهەڵاتی سووریا و حکوومەتی عێراق سەرپەرشتی دەکرێت.
ئەوە، بیست و هەشتەمین کاروانە، لە دوای دەستپێکردنی هەڵمەتی گەڕاندنەوەی ئەو خێزانە عێراقییانەی لە کەمپەکەدا بوون. کاروانە نوێیەکە، لە ٢٣٣ خێزانی عێراقی پێکهاتووە، کە ٨١٢ کەس لەخۆدەگرت و یازدەمین کاروانی ناردنەوەی خێزانە عێراقییەکان لەماوەی ئەمساڵ پێکدەهێنێت.
سەرچاوەکانی نزیک لە سەرپەرشتیارانی هەڵمەتەکانی ناردنەوەی دانیشتووانی کەمپەکە بۆ شوێن و وڵاتانی خۆیان، ئاماژە بەوە دەکەن، کە لێکۆڵینەوەی ورد لە دۆسیەی خێزانە گەڕاوەکاندا کراوە، بۆ دڵنیابوونەوە لەوەی کە لە هەر پێوەندییەکی پێشوو بە ڕێکخراوە توندڕۆکانەوە دوورن.