ئەمڕۆ یەکشەم، ٤ی ئازاری ٢٠٢٤، بەڕێوەبەرایەتییەکە لە ڕاگەیەندراوێکدا ئاشکرای کرد، دوو تۆمەتباریان بەناوەکانی (ع. ا. م) و (ب. ف. ح) دەستگیر کردووە، دوای ئەوەی لەلایەن هاووڵاتییەکەوە بەناوی (ا. م. س) دانیشتووی وڵاتی کوێت، بەڕێوەبەرایەتییەکەی ئاسایش ئاگادار کراوەتەوە، لەوەی لەلایەن گرووپێکی دانیشتووی هەرێمی کوردستانەوە، وێنەی نەشیاوی ئەویان لە تۆڕە کۆمەڵایەتییەکانەوە دەستکەوتووە و دواتر هەڕەشەی بڵاوکردنەوەی وێنەکانیان کردووە و بەردوامیش داوای پارەیان لێ کردووە و ناوبراویش لەڕێگەی حەواڵەوە لە کوێتەوە پارەی بۆ ناردوون بۆ شاری هەولێر.
بەڕێوەبەرایەتی ئاسایشی ئابووری، باس لەوە دەکات، کە دوای بەدواداچوون و لێکۆڵینەوە هەردوو تۆمەتبارەکەیان دەستگیر کردووە، کە هەڕەشەیان لە سکاڵاکار و چەندین هاووڵاتی دیکە کردووە. تۆمەتباران پەڕاوی لێکۆڵینەوەیان بۆ کراوەتەوە و ڕووبەڕووی یاسا کراونەتەوە.