عه‌زیز ئه‌حمه‌د جێگری به‌ڕێوه‌به‌ری نووسینگەی سه‌رۆكوه‌زیرانی هه‌رێمی كوردستان، وەک وەڵامدانەوەیەک بۆ ئەو هەواڵ و زانیارییانەی باس لە بڕینی پارە لە بەشدارانی پڕۆژەی هەژماری من و هەبوونی گرێبەستی نهێنی و شاراوە لە پڕۆژەکەدا دەکەن، ڕوو لە بەشدارانی “هەژماری من” ڕایگەیاند: “هیچ بڕە پارەیەک لە هەژمارەکەتدا نابڕدرێت”. و زیاتر گوتی: “هیچ گرێبەستێکی نهێنی و شاراوەت پێ واژۆ ناکرێت؛ هیچ سنوورێک نییە لەسەر بڕی ڕاکێشراوی پارەکەت”.
جێگری به‌ڕێوه‌به‌ری نووسینگەی سه‌رۆكوه‌زیرانی هه‌رێمی كوردستان، ئاماژەی بەوەش کردووە: “هەر لایەنێک کە بانگەشەی پێچەوانەی ئەم ڕاستییانە دەکات، بەدوای سەرلێشێواندن و بڵاوکردنەوەی زانیاری نادروستە”.
ئەو داواش لە فەرمانبەران و مووچەخۆران دەکات، کە پرسیارەکانیان ئاڕاستە بکەن “بۆ دۆزینەوەی ڕاستییەکان”.
ئەو ڕوونکردنەوەیەی جێگری به‌ڕێوه‌به‌ری نووسینگەی سه‌رۆكوه‌زیران، لەکاتێکدایە کە چەند کەناڵێکی میدیایی ئەوەیان بڵاوکردووەتەوە، کە گرێبەستێکی نهێنی و شاراوە بەشێوەی ئەلیکترۆنی بە بەشدارانی پڕۆژەی “هەژماری من” واژۆ دەکرێت، بەڵام گرێبەستەکە پیشانی مووچەخۆران نادرێت و ئەو گرێبەستەیش چەند خاڵێکی تێدایە بۆ گەڕاندنەوەی قەرزی ئاو و کارەبا و پێشینەکان کە مووچەخۆران قەرزاری حکوومەتن و جگەلەوەش هەر کاتێک بانک مەبەستی بێت، کرێی دابەشکردنی مووچەکە زیاد دەکات.