د.موسه‌ننا ئه‌مین ئه‌ندامی ئه‌نجوومه‌نی نوێنه‌رانی عێراق له فراكسیۆنی یه‌كگرتوو به میدیای فەرمی حزبەکەی ڕاگه‌یاند: “ئه‌و گرفتانه‌ی هه‌یه له باره‌ی دواكه‌وتنی مووچه‌ی مانگی حه‌وتی فه‌رمانبه‌ران له ئه‌ستۆی هه‌رێمی كوردستانه، چونكه مانگانه كه‌موكورتی زۆری هه‌یه له‌و لیستانه‌ی كه بۆ وه‌زاره‌تی دارایی عێراقی ده‌ینێرێت”.
بەگوتەی موسەننا ئەمین، ئه‌گه‌ر گرفتێك هه‌بێت كێشه‌ی هونه‌رییه و حكوومه‌تی هه‌رێم لێی به‌رپرسیاره: “به ته‌واوی زانیارییه‌كان بۆ به‌غدا نانێرێت”.
له‌باره‌ی ئه‌وه‌ی كه دەگوترێت پارەی نەختینە له به‌غداوه نییه بۆیه مووچه‌ی فه‌رمانبه‌رانی هه‌رێم دواكه‌وتووه، پەرلەمانتارەکە گوتی: “عێراق بودجه‌یه‌كی گه‌وره‌ی له‌به‌رده‌سته و گرفتی پاره‌ی نییه، هیچ ئیراده‌یه‌ك بۆ نه‌دانی مووچه نییه و كۆتایی پێهاتووه، ئه‌گه‌ر گرفتێك هه‌بێت هونه‌رییه و ده‌بێـت چاره‌سه‌ر بكرێت”.