زێدپرێس
ئەمڕۆ پێنجشەم ٣ی ئابی ٢٠٢٣، بەڕێوەبەرایەتی پۆلیسی دارستان و ژینگەی سلێمانی دوو ڕووداوی ئاگرکەوتنەوە و کۆنتڕۆڵکردنیانی ڕاگەیاند.
بەپێی پۆلیسی دارستان، لە ٢ی ئاب، ئاگرێکی فرەوان لە سنووری ئێرانەوە بۆ سنووری شارۆچکەی پێنجوێن و گوندەکانی (هوشیاری و باخی) سەر بە شارەدێی ناڵپارێز پەڕیوەتەوە. لە کاتژمێر ٧:٠٠ی ئێوارەوە، مەفرەزەی بنکەی پۆلیسی دارستان و ژینگەی ناڵپارێز چوونە شوێنی ڕووداوەکە و لە دوای هەوڵدانێکی زۆر بەهاوکاری چەند هاووڵاتییەکی دانیشتووی گوندەکان تا کاتژمێر ١٢:٠٠ی شەو توانیویانە ئاگرەکە کۆنتڕۆڵ بکەن.
بەپێی پۆلیسی دارستان، بەهۆی سەختی ناوچەکە و فرەوانی ئاگرەکەوە بەشێکی بە شێوازی (ئاگربڕ) کۆنتڕۆڵ کراوە و بەهۆی ئەو ڕووداوەیشەوە، نزیکەی سێ هەزار و ٥٠٠ دۆنم دارستان و پوش و پاوانی ناوچەکە سوتاوە.
ئاگرکەوتنەوەی دووەم، لە سنووری شارەدێی خدران و لە گوندەکانی (کەلکان، باسەرێ، مێوژە و شووشکە) ڕوویدا.
پۆلیسی دارستان و ژینگەی سلێمانی، ڕای گەیاند، دوای ئاگادارکردنەوەیان، مەفرەزەیەک لە کارمەندانی بنکەی پۆلیسی دارستانی خدران بە فەرمانی ئەفسەری بنکە، گەیشتنە شوێنی ئاگرەکە و دەستبەجێ دەستیانکرد بە کوژاندنەوەی ئاگرەکە، دوای چەند کاتژمێرێک توانرا ئاگرەکە کۆنتڕۆڵ بکرێت، بە هاوکاری دانیشتوانی سنورەکە و پۆلیسی ئاگرکوژێنەوەی خدران.
بەپێی پۆلیسی دارستان، زەرەر و زیانی ئاگرەکە مەزەندە دەکرێت بە سوتانی شەش هەزار دۆنم لە پەرێزی گەنم و قەسەڵ و کای هاووڵاتیانی سنورەکە.
“تا ئێستا، هۆکاری ئاگرکەوتنەوەکە نەزانراوە و بەدواداچوون بەردەوامە و پەڕاوی لێکۆڵینەوەی بۆ کراوەتەوە و ڕادەستی دادوەر کراوە بۆ وەرگرتنی ڕێکاری یاسایی”، پۆلیسی دارستان و ژینگەی سلێمانی وا دەڵێت.