زێدپرێس
حەسەن فەتاح گوتەبێژی بەڕێوەبەری گشتی ڕۆشنبیری و هونەری پارێزگای دهۆک، لە ڕوونکردنەوەیەکدا لەبارەی کۆسێرتەکەی دیلان تاتڵیساس کچی گۆرانیبێژ ئیبراهیم تاتڵیساس، ڕای گەیاند، ئەوان وەک بەڕێوەبەرایەتی گشتی ڕۆشنبیری و هونەری پارێزگای دهۆک هیچ پەیوەندییەکیان بە کۆنسێرتەکەی ناوبراوەوە نییە، بەڵکوو کۆنسێرتەکە لەلایەن کەرتی تایبەتەوە ساز کراوە.
گوتەبێژی بەڕێوەبەرایەتی گشتی ڕۆشنبیری و هونەری پارێزگای دهۆک، باس لەوە دەکات، وەک هەر خەڵکێکی دیکە زانیویانە کۆنسێرتەکە لە خواردنگەیەکی شارەکە ساز دەکرێت، بەڵام وەک ئامادەکاری و هەماهەنگی، پەیوەندییەکیان بەو کارەوە نەبووە.
ڕوونکردنەوەکەی حەسەن فەتاح پاش سازکردنی کۆنسێرتێکی میوزیک و گۆرانی دێت، کە دوو ڕۆژی ڕابردوو لە شاری دهۆک ساز کرا و لە تۆڕە کۆمەڵایەتییەکانیشدا زۆر کەس نیگەرانیان لە سازکردنی کۆنسێرتەکە ڕاگەیاند، زیاتر بەهۆی هەڵوێستەکانی ئیبراهیم تاتڵیساس لە پشتیوانی ئەردۆغان و بەتایبەت لەسەر وەختی داگیرکردنی عەفرین لەلایەن سوپای تورکیاوە و هاوکات سازکردنی کۆنسێرتەکەیش لەکاتێکدایە، کە سوپای تورکیاوە بەپاساوی لێدان لە پەکەکە، بەڕێگەی درۆنەوە، هێرشەکانی لە هەرێمی کوردستان چڕ کردووەتەوە و لە دوو هەفتەی ڕابردوویشدا، چەند هاووڵاتی مەدەنی لە هێرشە درۆنییەکانی تورکیا لە دهۆک و سلێمانی گیانیان لە دەستداوە.
لەپاڵ ئەوانەی ناڕەزایەتییان دەربڕی، ژمارەیەکی زۆریش لە کۆنسێرتەکەدا بەشداربوون، میدیاکان ئاماژەیان بە فرۆشتنی سێ تا چوار هەزار بلیتی ئامادەبوون لە کۆنسێرتەکە کردووە.
گوتەبێژی بەڕێوەبەری گشتی ڕۆشنبیری و هونەری پارێزگای دهۆک، هەر لە هەمان ڕوونکردنەوەدا دەڵێ “ئێمە دەسەڵاتی سانسۆرکردنمان لەسەر کەرتی تایبەت نییە، ئەگەر هەستن بە سازکردنی لایف میوزیک یان ئاهەنگێکی هونەری بۆ مەبەستی بازرگانی”.