زێدپرێس
کاوە لەتیف، پارێزەری کەریم عەلی، بە ڕادیۆی “دەنگ”ی ڕاگەیاندووە: دوای ئەوەی لەلایەن وەزارەتی داراییەوە سکاڵا لەسەر کەریم عەلی ئەندامی ئەنجوومەنی پارێزگای سلێمانی تۆمارکرا، ئەمڕۆ چووە بەردەم دادگای لێکۆڵینەوەی کەلار و لەلایەن دادوەرەوە بڕیاری ڕاگرتنی درا هەتا تەواوکردنی لێکۆڵینەوەکان و ئێستا لە گرتووخانەی ئاسایش ڕاگیراوە.
گوتیشی: سکاڵاکەی وەزارەتی دارایی بە پشت بەستن بە مادەی (٢)ـی یاسای خراپ بەکارهێنانی ئامێرەکانی پەیوەندیکردن تۆماری کردووە.
بەپێی یاسا تەوقیفکردن تاوەکو ١٥ ڕۆژە، پارێزەرەکەی کەریم عەلی جەختی لەوە کردەوە و گوتی: سبەی هەوڵدەدەین بە کەفالەت ئازادی بکەین، بەڵام بڕیار لای دادوەرە ئازادی دەکات یاخود نا.
کەریم عەلی، پێشتر لە بەرنامەیەکی تەلەفزیۆنیی دا باسی لە بونی حاڵەتی نایاسایی و قاچاخی لە دەروازەی پەروێزخان کردبوو، کە دەروازەیەکی نێودەوڵەتی نێوان ئێران و هەرێمە لە گەرمیان، لەدوای بەرنامەکەش وەزارەتی دارایی لە کۆنگرەکەی ڕۆژنامەوانیی دا وەڵامی دایەوە و چەند ڕۆژێک دواتر سکاڵای لە دادگای لێکۆڵینەوەی ئاسایش لەسەر تۆمارکرد و فەرمانی دەستگیرکردنی بۆ دەرکرا.