زێدپرێس
لە ئەنجامی ڕووداوێکی هاتوچۆدا، بارهەڵگرێکی سووتەمەنی لە شەقامی ١٢٠ مەتری هەولێر کەوتە خوارەوە و زیانێکی زۆری ماددی لێکەوتەوە.
فازڵ حاجی گوتەبێژی پۆلیسی هاتوچۆی هەولێر ڕایگەیاند، کاتژمێر ١٢:٣٠ خوولەکی دوانیوەڕۆی ئەمڕۆ سێشەم ٣ی تشرینی یەکەمی ٢٠٢٣، ئۆتۆمبێلێکی تایبەت خۆی کێشا بە دواوەی تانکەرێکی سووتەمەنی و بەهۆی گوشاری پێکدادانەکەوە، شوفێری تانکەرەکە کۆنتڕۆڵی لە دەستدا و پاش شکاندنی زیاتر لە ٦٠ مەتر گاردرێڵ و ٧ ستوونی کارەبا، لە هەڵدێرێک کەوتووەتە خوارەوە.
گوتەبێژی پۆلیسی هاتوچۆی هەولێر، ڕوونیکردەوە، بەهۆی ڕووداوەکەوە شوفێری تانکەرەکە بریندار بووە و زیانێکی یەکجار زۆری ماددییش کەوتووەتەوە.
ڕۆژی یەکشەم ٢ی تشرینی یەکەم، بەهەمان شێوە بارهەڵگرێکی دیکە لە ئەنجامی پێکدادانێکدا، لە شەقامی ١٢٠ مەتری هەولێر کەوتە خوارەوە و بەهۆی ڕووداوەکەیشەوە ٤ کەس بریندار بوون.