زێدپرێس
ئامینە زکری بەرپرسی دەستەی چاودێری و بەدواداچوونی پارتی، ئاماژەی بە ئەنجامەکانی سەردانەکەی مەسعوود بارزانی کرد بۆ دهۆک و ڕوونیکردەوە، کە لە سەردانە شەش ڕۆژییەکەی بارزانی بۆ پارێزگای دهۆک و ئیدارەی سەربەخۆی زاخۆ، لە ناوەڕاستی مانگی ئابی ئەمساڵ، لە دیدار و کۆبوونەوە لەگەڵ چین و توێژەکاندا، هەڵوەستەی لەسەر چوار تەوەری سەرەکی کردووە:
- پێویستە گەلی کوردستان لەبیری نەکات کە خاوەن دۆزێکی ڕەوایە و کێشەی ئێمە پرسی خاک و سنوری جوگرافییە.
- تەوەرێکی دیکەی جێی بایەخی مەسعوود بارزانی، قسەکردن بووە لەسەر “پیلانی دوژمن بەڕێگای ماددەی هۆشبەر و مەترسی لەسەر کۆمەڵگا و بێ ئیرادەکردنی تاکی کورد و لاوازکردنی کەسایەتی مرۆڤ”.
- مەسعوود بارزانی باسی لەوە کردووە، کە “پێویستە تەنیا پشت بە نەوت نەبەستین و ژێرخانی ئابووری هەرێم بەهێز بکەین”.
- تەوەرێکی دیکە، بە پێویستزانینی فرەکردنی سەرچاوەکانی ئابووری و لەناویاندا گرنگی پشتبەستن بە کەرتی کشتوکاڵ و گەشتاری بووە.
بەگوتەی ئامینە زکری، لە دیدار و کۆبوونەوەکاندا، خەڵکی پارێزگاکە، پێشنیاز و ڕەخنە و داواکاریی خۆیان خستووەتەڕوو و ئاشکرای دەکات، کە زیاتر لە ٤ هەزار داواکاری کەسی، پێشکەشی مەسعوود بارزانی کراون و سەرجەم داواکارییەکان لەلایەن دەستەی چاودێری و بەدواداچوونی سەربە سکرتاریەتی سەرۆکی پارتی وەرگیراون.
بەرپرسی دەستەی چاودێری و بەدواداچوونی پارتی، ڕوونی دەکاتەوە، هەندێک پڕۆژەی خزمەتگوزاری کە خەڵکەکە داوایان کردووە، “جەنابی سەرۆک ڕاستەوخۆ بڕیاری جێبەجێکردنیدان” و زیاتر دەڵێ “لەسەر فەرمانی جەنابیان(مەسعوود بارزانی)، مەسرور بارزانی سەرۆکی حکوومەتی هەرێم ڕەزامەندی لەسەر جێبەجێکردن و تەرخانکردنی پارەی پێویست دا”.
لەو چوارچێوەیەشدا، ئامینە زکری ئاماژە بە ژمارەیەک پڕۆژە لە سنوری پارێزگای دهۆک دەکات، کە لەلایەن بارزانییەوە بڕیاری جێبەجێکردنیان دراوە، بەم شێوەیە:
لە بواری خزمەتگوزاری گشتیدا:
- دابینکردنی زیاتر لە ١٨ ملیار دینار بۆ ٢٠ پڕۆژەی خزمەتگوزاری لە دەڤەری سێمێل (ڕێگەوبان، کارەبا، پەروەردە، ئاو و ئاوەڕۆ و زیادکردنی ڕووبەری سەوزایی).
- دروستکردنی باڵەخانەی کۆلیژی پەروەردەی بنیات لە ئامێدی.
- دروستکردنی باڵەخانەی دادگە لە ئامێدی.
بۆ ھەردوو پڕۆژەکە زیاتر لە ٩ ملیار دینار تەرخانکراوە.
- دروستکردنی ھۆڵێکی بۆنەکان لە قەزای بەردەڕەش، کە زیاتر لە ٧ ملیار دیناری بۆ تەرخانکرا.
- دروستکردنی یاریگەی تۆپی پێی سێمێل کە زیاتر لە ٥ ملیار دیناری بۆ تەرخانکرا.
- دروستکردنی پڕۆژەی تونێلی پێرس بە درێژایی (٣٠٠٠م) و زیاتر لە ١٤١ ملیار دیناری بۆ تەرخان دەکرێت.
- بڕیاری دروستکردنی مۆزەخانەی (کەلی نزارکێ).
- جێبەجێکردنی پڕۆژەی ئاوی ئاکرێ، بە گوژمەی ١٠٩ ملیار دینار.
لەبواری گەشتیاریدا:
تا ئێستا ئەم پڕۆژانە جێبەجێکران و بەردەوامن:
- دانانی بەردی بناغەی کۆمەڵگەیەکی گەشتیاری لە سۆلاڤ- ئامێدی کە (ھۆتێل، مەلەوانگە و مۆتێل) لەخۆدەگرێت.
- دانانی بردی بناغەی گەراجەکی سێ نھۆمی لە سۆلاڤ- ئامێدی.
- نۆژەنکرەنەوە و دروستکردنی ڕێگەوبان و بازگەی نێوان دهۆک و پارێزگای مووسڵ.
- قەدەغەکردنی بە کرێدانی باخ (مەزرەعە) بە گەشتیاری بیانی.
- جێبەجێکردنی کۆڕنیش لە سەر ڕوباری شین.
لەبواری کشتوکاڵیدا:
- سازکردنی ڤیستڤاڵی بەرهەمی خۆماڵی لە ئاکرێ.
- بڕیاری دروستکردنی کارگەی سماق لە ئاکرێ.
- بڕیاری سازکردنی ڤیستڤاڵی تەحین لە ئاکرێ.
- ئامادەکاری بۆ سازکردنی فیستڤاڵی بەرهەمی خۆماڵی لە دەڤەری بەرواری.
- سازکردنی فیستڤاڵی ترێ و هەنگوین لە سەر ئاستی پارێزگای دهۆک.
وەک بەرپرسی دەستەی چاودێری و بەدواداچوونی پارتی ئاماژەی بۆ دەکات، جگە لەو خاڵانەی سەرەوە، وەرگرتنەوەی قەرزی پێشینەی هاوسەرگیری و خانووبەرە ڕاگیراوە و سەرجەم شوێنەکانی (دۆمبەلە) لەسەر ڕەخنە و گلەیی خەڵکەکە داخران و لایەنەکانی ئەمنیش ئاگەدارکرانەوە، کە بە جددی بەرەنگاری ماددە هۆشبەرەکان ببنەوە، بەتایبەت ڕێکاری توند لە دژی بازرگانیکردن بە ماددەی هۆشبەر لەبەربگیرێت و هەر بۆ هەمان مەبەستیش لە ڕۆژانی داهاتوودا، کۆنفرانسەکی زانستی لەمەڕ بەرەنگاربوونەوەی ماددەی هۆشبەر لە دهۆک ساز دەکرێت.