زێدپرێس
ئەمڕۆ دووشەم ٩ی تشرینی یەکەمی ٢٠٢٣، موقتەدا سەدر، ڕێبەری ڕەوتی سەدر، لە پەیامێکدا کە لە هەژماری تایبەتی خۆی لە تۆڕی کۆمەڵایەتی ئێکس (تویتەری پێشوو) بڵاویکردەوە، داوای لە هاووڵاتییانی عێراق و هەوادارەکانی کرد، ڕۆژی هەینی داهاتوو، بۆ پشتیوانی لە گەلی فەڵەستین بڕژێنە سەر شەقام و خۆپیشاندانی ملیۆنی ڕێک بخەن.
سەدر، کە داوا لە شوێنکەوتووانی دەکات لە گۆڕەپانی تەحریر کۆببنەوە، وەک پشتیوانی لە گەلی فەڵەستین و “بەرزکردنەوەی دەنگی جیهاد لە بەغدای پایتەختی عێراق و گەیاندنی بە هەموو جیهان”.
هەر لەو پەیامەیدا، ڕێبەری ڕەوتی سەدر، بەتوندی هەڕەشە لە ئەمریکا دەکات و هەروەها جەنگی ئیسرائیل و حەماس، بە “گەلەکۆمەی نێودەوڵەتی” دژ بە فەڵەستین پێناسە دەکات.
ڕۆژی شەممەی ڕابردوو، چەکدارانی بزووتنەوەی حەماس هێرشێکی کتوپڕ و بەرفرەوانیان کردە سەر ئیسرائیل و سەدان کەسیان کوشت و دەیان هاووڵاتی ئیسرائیلیشیان بە دیل گرت و بۆ غەززەیان گواستنەوە.
لە بەرانبەر ئەو هێرشەدا، سوپای ئیسرائیل دەستی بە وەڵامدانەوە کردووە و هێرشە ئاسمانییەکانی بۆ سەر کەرتی غەززە چڕ کردووەتەوە.
