زێدپرێس
ئەنتۆنی بلینکن، وەزیری دەرەوەی ئەمریکا، ئەمڕۆ یەکشەم، ٥ی تشرینی دووەمی ٢٠٢٣، گەیشتە بەغدا و لەگەڵ محەمەد شیاع سوودانی، سەرۆکوەزیرانی عێراق کۆبووەوە.
دوابەدوای دیدارەکە ڕایگەیاند، دیدار و گفتوگۆیەکی ڕاشکاوانەی لەگەڵ سەرۆکوەزیرانی عێراق هەبووە و سوودانی سەرکۆنەی هێرشەکانی سەر بنکەکانی ئەمریکای کردووە.
بلینکن هۆشداری بە میلیشیاکانی سەر بە ئێران دا، کە جەنگی غەززە بۆ هێرشکردنە سەر بەرژەوەندییەکانی ئەمریکا لە عێراق و ناوچەکە نەقۆزنەوە و زیاتر گوتی، نایانەوێت هیچ ڕووبەڕووبوونەوەیەکیان لەگەڵ ئێران هەبێت، بەڵام هەر ڕێکار و ڕێوشوێنێک لەپێناو پاراستنی بەرژەوەندییەکانیان، هێزەکانیان و هاووڵاتییانیان لەبەردەگرن.
هەر ئەمشەو، لایەنگرانی موقتەدا سەدر لە گۆڕەپانی تەحریر لە ناوەندی شاری بەغدا، دەستیان بە خۆپیشاندان و گردبوونەوەی ناڕەزایەتی کرد، دژ بە سەردانەکەی وەزیری دەرەوەی ئەمریکا بۆ عێراق.