زێدپرێس
بەڕێوەبەرایەتی پۆلیسی پارێزگای سلێمانی، ئەمڕۆ سێشەم، ٧ی تشرینی دووەمی ٢٠٢٣، ڕایگەیاند، دوای ئەوەی زانیاری گەیشتووەتە دەست هێزەكانی پۆلیس كە ئۆتۆمبێلێك هاووڵاتییەكی برینداركردووە و هەڵاتووە، هێزەكانی پۆلیس لێكۆڵینەوە و بەدواداچوونەكانیان دەستپێكردووە و دوای وەرگرتنی بڕیاری دادوەر، توانرا لەلایەن بنكەی پۆلیسی بەختیارییەوە ئۆتۆمبێلەكە لە ناوچەی پیشەسازی بدۆزرێتەوە و دواتریش تۆمەتبارەكە دەستگیربكرێت
بەڕێوەبەرایەتی پۆلیسی پارێزگای سلێمانی، باسی لەوە کردووە، کە ڕووداوەكە بەجۆرێك بووە، هاووڵاتییەك سەرقاڵی كۆكردنەوەی مقەبا بووە، شۆفێرێك بە ئۆتۆمبێلەكەی لێیداوە و برینداری كردووە و هەڵاتووە.
پۆلیس گرتەیەکی ڤیدیۆیی بڵاوکردووەتەوە، کە لە کامێرای چاودێرییەوە وەرگیراوە و لەو کاتەدا هاووڵاتییەک، کە وا دەردەکەوێت بە ماتۆڕسکیلێکی سێ تایە، لە حاویەیەکی زبڵدا پاشماوەی کارتۆن و مقەبا کۆدەکاتەوە، ئۆتۆمبێلێک بەتوندی خۆی پێدا دەکێشێت، بەڵام ناوەستێت و هەڵدێت.
بەپێی ڕاگەیەندراوی پۆلیسی سلێمانی، تۆمەتبارەکە بەناوی (أ. ع.) بەبڕیاری دادوەر و بەپێی ماددەی ٢٣ لە یاسای هاتووچۆ ڕاگیراوە و دەستیش بەسەر ئۆتۆمبێلەكەیدا گیراوە.