زێدپرێس
ئێوارەی ئەمڕۆ پێنجشەم، ٢٣ی تشرینی دووەمی ٢٠٢٣، بەڕێوەبەرایەتی ئاسایشی هەولێر، ڕایگەیاند، دوای وەرگرتنی ڕەزامەندی دادوەری لێکۆڵینەوەی ئاسایشی هەولێر، تۆمەتبارێکیان بەناوی (ڕ. ح. م) بە تۆمەتی ئەنجامدانی سیحر و جادوو دەستگیرکردووە.
بەگوێرەی ئاسایشی هەولێر، لەکاتی لێکۆڵینەوەکاندا دەرکەوتووە، کە “چەندین ئافرەتی فریوداوە و دەستدرێژی کردۆتە سەریان و بۆ مەرامی خۆی به كاريانی هێناوە و سوودی مادديان لێ وەردەگرێت”.
ئاسایشی هەولێر، دەڵێ، بە بڕیاری دادوەر پشکنین بۆ ماڵەکەشی کراوە و لەماڵەکەیدا دەستیان بەسەر ژمارەیەکی زۆر کەلوپەلی جۆراوجۆر و ئەندامی لاشەی ئاژەڵی کێویدا گرتووە، کە بەکاری هێناوە بۆ سیحر و جادووکردن.
ئاسایشی هەولێر، بەتایبەت داوا لە ئافرەتان دەکات کە “خۆیان بەدوور بگرن لەم جۆرە کەسانە و پەنایان بۆ نەبەن و باوەڕیان پێ نەکەن، چونکە ئەم جۆرە کەسانە دەبنە مایەی کێشە و هەڕەشە بۆسەر خۆیان و خانەوادەکەشیان”.
لە ڕاگەیەندراوەکەی ئاسایشدا هاتووە، کە هەر کەسێک سکاڵای یاسایی لەسەر تۆمەتبارەکە هەیە، بەڕێگای دادگا دەتوانێت سکاڵای لەسەر تۆمار بکات.