زێدپرێس
بەیانی ئەمڕۆ دووشەم، ٢٧ی تشرینی دووەمی ٢٠٢٣، لە سنوری حەفتەغاری سەربە پارێزگای کەرکووک، گرژی و ئاڵۆزی لە نێوان جووتیارانی کورد و عەرەبە هاوردەکاندا درووستبوو، پاش ئەوەی ژمارەیەک عەرەبی هاوردە هەڵیانکوتایە سەر جووتیارانی کورد لە سنوری حەفتەغار و داوای ڕادەستکردنی زەوی و زاریان لە جووتیارانی کورد کرد.
عەرەبە هاوردەکان لەچوارچێوەی تەعریبی کەرکووک و لەلایەن ڕژێمی بەعسەوە بە گرێبەست زەوییەکانیان پێدراوە، دوای دەرکردن و زەوتکردنی زەوییەکە لە جووتیارانی کورد و ئێستا جارێکی دیکە دەیانەوێ دەستبەسەر زەوییەکاندا بگرنەوە.
سەرچاوەیەکی ئاگادار لە سنورەکە بۆ زێدپرێس ڕایگەیاند، سوپا و پۆلیسی عێراقی بەسەر ڕووداوەکەدا چوون و لانیکەم چوار جووتیاری کوردیان دەستگیرکردووە، بەتۆمەتی ئەوەی تەقەیان بەسەر عەرەبە هاوردەکاندا کردووە.
ئەو سەرچاوەیە گوتیشی، هەر لەلایەن سوپای عێراقەوە، ژمارەیەک لە عەرەبە هاوردەکان دەستگیرکراون، کە هەڵیانکوتاوەتە سەر جووتیارە کوردەکان.