زێدپرێس
ئاژانسی فرانس پرێس لە زاری سەرچاوەیەکی دەزگای هەواڵگری پاکسانەوە ڕایگەیاند، سەرلەبەیانی ئەمڕۆ پێنجشەم ١٨ی کانوونی دووەمی ٢٠٢٤، سوپای پاکسانی چەند بنکەیەکی گرووپە جوداخوازەکانی لەناو خاکی ئێران- پارێزگای سیستان و بەلوچستان بۆردمان کردووە.
هێرشەکە بە ڕێگەی مووشەک و درۆنەوە ئەنجامدراوە، وەک وەڵامدانەوەیەک بۆ ئەو هێرشەی سێشەمی ڕابردوو لەلایەن سوپای ئێرانەوە و لە خاکی پاکستان ئەنجامدرا. وەک ئەوەی مومتاز زەهرا بەلووچ گوتەبێژی وەزارەتی دەرەوەی پاکسان ڕایگەیاندووە، هێرشەکەیان وەڵامێکە بۆ پێشێلکردنی سەروەریی پاکستان لەلایەن ئێرانەوە.
پێشتر سوپای پاکستان ڕایگەیاند بوو، هێرشەکەی ئێران بێوەڵام نامێنێتەوە.
هەر ئەمڕۆ تەلەفیزیۆنی فەرمی ئێران لە زاری بەرپرسێکی وڵاتەکەوە بڵاویکردەوە، ئێران داوای ڕوونکردنەوەی خێرا لە پاکستان دەکات لەمەڕ ئەو هێرشەکەی ئەمڕۆی پاکسان بۆ سەر باشووری وڵاتەکە.