ئێوارەی ئەمڕۆ دووشەم، ٢٩ی کانوونی دووەمی ٢٠٢٤، بەڕێوەبەرایەتی ئاسایشی سلێمانی ڕایگەیاند، دوای کەمتر لە ٤:٠٠ کاتژمێر لە دیارنەمانیان، دوو هاوڵاتی پارێزگای زیقار کە لەلایەن کەسوکاریانەوە گوماندەکرا ڕفێنرابن، دۆزرانەوە و دەرکەوت تۆمەتبارن بە دزیکردن.
بەڕێوەبەرایەتی ئاسایشی پارێزگای سلێمانی/ ناوشار، ڕایگەیاند، لەدوای بەدەستگەیشتنی نووسراوێکی پۆلیسی پارێزگای زیقار، لەسەر سکاڵای باوکێک سەبارەت بە دیارنەمانی دوو کوڕە هەرزەکارەکەی، دەستبەجێ هێزەکانی ئاسایش دوای کۆکردنەوەی زانیاری و بەدواداچوون، دەرکەوت لەڕێگەی گرووپێکی گەشتیارییەوە هاتوونەتە شاری سلێمانی و لە هۆتێلێکدا ماونەتەوە، پاش لێکۆڵینەوە لەگەڵیان دەرکەوت بڕی ٣٥ ملیۆن دیناری عێراقییان لە باوکیان بردووە و خۆیان حەشارداوە.
بەڕێوەبەرایەتی ئاسایشی سلێمانی دەڵێ، ئێستا هەردوو تۆمەتبار ڕووبەڕوی یاسا کراونەتەوە.