ئەمڕۆ پێنجشەم، ٨ی شوباتی ٢٠٢٤، یەحیا ڕەسووڵ گوتەبێژی فەرماندەیی هێزە چەکدارەکانی عێراق بەیاننامەیەکی لەبارەی هێرشەکەی شەوی ڕابردووی ئەمریکا کە تیایدا دوو بەرپرسی حزبوڵای عێراقی کردە ئامانج بڵاوکردەوە و ڕایگەیاند، هێرشەکەی ئەمریکا هەڕەشە لە ئاشتی دەکات و پێشێلکردنی سەروەری عێراقە و هاوکات ژیانی خەڵک و گەلی عێراق دەخاتە مەترسییەوە.
گوتەبێژی فەرماندەیی هێزە چەکدارەکانی عێراق ئاماژەی بەوەش کردووە، ئەم کارانەی ئەمریکا، زیاتر پاڵ بە حکوومەتی عێراقەوە دەنێت بۆ کۆتاییهێنان بە ئەرکی هاوپەیمانێتییەکە، کە بووەتە هۆی ناسەقامگیری و مەترسی کێشکردنی عێراق بۆ ناو بازنەی ململانێیەکان.
یەحیا ڕەسووڵ، زیاتر دەڵێ، ئەمریکا چەندین جارە و نابەرپرسانە هەموو ئەو کردەوانە ئەنجام دەدەن کە دەشێت لێکتێگەیشتنەکان و دەستپێکی گفتوگۆی دووقۆڵی تێکبدات.
کاتژمێر ٩:٣٠ خوولەکی شەوی ڕابردوو، بە درۆن هێرشکرایە سەر ئۆتۆمبێلێکی کەتایبی حزبوڵای عێراق لە ڕۆژهەڵاتی شاری بەغدا و بەهۆیەوە دوو بەرپرسی کەتایبی حزبوڵای عێراق ئەبو باقر ساعیدی و ئەرکان عەلیاوی کوژران.
دوابەدوای هێرشەکە، ئەمریکا بەرپرسیارێتی لە ئەستۆگرت و ڕایگەیاند، ئەوانەی بە ئامانجگیراون بەرپرسی ڕاستەوخۆن لە هێرشی سەر هێزەکانی ئەمریکا. بەپێی ڕاگەیەندراوی فەرماندەیی ناوەندی ئەمریکا، ساعیدی فەرماندەی کەتایبی حزبوڵا بەرپرسی ڕاستەوخۆ بووە لە پلاندانان و بەشداریکردن لە هێرشکردنە سەر هێزەکانی ئەمریکا.