ڕۆژی چوارشەم ٧ی شوباتی ٢٠٢٤، ساسان عەونی، وەزیری شارەوانی و گەشتوگوزار لەگەڵ ئەندازیار و فەرمانبەرانی یەكەی گۆڕینی كارتی زەوی بۆ سەنەد لە وەزارەت كۆبووەوە و پلانی نوێی تاپۆكردنی ئەو زەوییانەی كە هێشتا ماون تاپۆ بكرێن، تاوتوێ كرا، وەزیری شارەوانی و گەشتوگوزار تیمەكەی ڕاسپارد بەزووترین كات ئەو كارتانەی ماون دەبێت تاپۆ بكرێن.
بەگوێرەی ماڵپەڕی فەرمی حکوومەتی هەرێمی کوردستان، پێشتر مەسرور بارزانی سەرۆکوەزیرانی هەرێمی کوردستان بڕیاری تاپۆکردنی زەوییە کارتەکانی داوە و لەو چوارچێوەیەدا، بەسەرپەرشتی ساسان عەونی، وەزیری شارەوانی و گەشتوگوزار یەکەیەکی تایبەت بە ناوی یەكەی گۆڕینی كارتی زەوی بۆ سەنەد کراوەتەوە.
هەر بەگوێرەی ماڵپەڕی فەرمی حکوومەتی هەرێم، لە ماوەی كابینەی نۆیەمدا لە سنووری سەرۆكایەتیی شارەوانیی هەولێر و بەڕێوەبەرایەتیی گشتیی شارەوانییەكانی هەولێردا ٩٥ هەزار زەویی كارت هەبوون، دوای دەستبەكاربوونی یەكەی گۆڕینی كارت بۆ سەنەد بە هەماهەنگی لەگەڵ فەرمانگە پەیوەندیدارەكانی شارەوانی و تۆماركردنی خانووبەرە و پارێزگەی هەولێر، تاكوو ئێستا ٥٥ هەزار و ٦٩٥ كارتی زەوی كارەكانیان تەواوكراون و وێنەی تۆمار(تاپۆ)یان بۆ دەركراوە و دراوەتەوە هاووڵاتییان.
هاوکات، ئێستا لە سنووری سەرۆكایەتیی شارەوانیی هەولێر كار لەسەر تاپۆكردنی ١٨ هەزار و ٢٥٥ زەویی كارت دەكرێت و ١٠ هەزار و ٩٥٠ كارتی دیكەش لە سنووری بەڕێوەبەرایەتیی گشتیی شارەوانییەكانی هەولێر كار بۆ بە تاپۆكردنیان دەكرێت و بەمزووانە كارەكانیان تەواو دەبێت.
ساسان عەونی، وەزیری شارەوانی و گەشتوگوزار “تیمی یەکەی گۆڕینی کارتی زەوی بۆ سەنەد ڕاسپارد بۆ ئەوەی بەزووترین كات كارەكانی ئەو زەوییە كارتانەی هێشتا تاپۆیان نییە تەواو بكرێن و هاووڵاتییان ببنە خاوەن تاپۆی خۆیان، ئاماژەی بەوەش كرد تاپۆكردنی ئەو زەوییە كارتانە بەلای حكوومەت و وەزارەتی شارەوانی و گەشتوگوزارەوە جێی بایەخدانە، لە سۆنگەی ئەوەی كە هاووڵاتییان مافی خۆیانە زەوییەكانیان بەزووترین كات بۆ تاپۆ بكرێت”، لە ڕاگەیەندراوەکەی حکوومەتدا هاتووە.