تەقوایی لە کاتێکدا لە سادەبێژییەکی بێوێنەدا هەوڵ دەدات خۆی وەك دژە-دیکتاتۆر نیشان بدات، دەکەوێتە ناو “تەڵەیەکەوە” کە تێیدا وڵاتی ڤەنزوێلا دەکاتە قوربانی بۆ تینوێتی سیاسی خۆی بەرانبەر بە دەسەڵاتی تاران!
ئابووریی گەمارۆ: ئەوەی تەقوایی نایەوێت بیبینێت
تەقوایی باس لە “پێداویستی و بێزاری گشتی” دەکات وەك بەڵگەیەك بۆ شکستی مادۆرۆ. ئەمە لوتکەی چەواشەکارییە. چۆن دەکرێت شرۆڤەکارێکی سیاسی “سزای بەکۆمەڵ”ی ٣٠ ملیۆن مرۆڤ فەرامۆش بکات؟ بەپێی ڕاپۆرتە فەرمییەکانی نەتەوە یەکگرتووەکان (UN) و ئامارەکانی CEPR، گەمارۆ ئابوورییەکانی ئەمریکا لە ساڵی ٢٠١٧وە تەنها هێرش نەبوو بۆ سەر مادۆرۆ، بەڵکو گەمارۆدانی دەرمان، خۆراک و سووتەمەنی بوو کە بووە هۆی گیانلەدەستدانی زیاتر لە (٤٠) هەزار هاووڵاتی مەدەنی تەنها لە ساڵی یەکەمدا. تەقوایی بەم فەرامۆشکردنە، “تیرۆری ئابووری”ی ئەمریکا سپی دەکاتەوە و هەموو تاوانەکە دەخاتە ملی سیستمێك کە سیستەمەکە خۆی لەژێر گەمارۆیەکی خنكێنەردایە.
کۆچ: داتا چەواشەکارەکان
تەقوایی باس لە کۆچی (٥) ملیۆن کەس دەکات، لە کاتێکدا داتاکانی UNHCR ئاماژە بە زیاتر لە ( ٧.٧ ) ملیۆن کۆچبەر دەکەن. بەڵام کێشەکە تەنها ژمارە نییە؛ کێشەکە لەوەدایە تەقوایی کۆچکردن تەنها وەك “هەڵاتن لە دیکتاتۆر” وێنا دەکات. ئەو نایەوێت دان بەوەدا بنێت کە داڕمانی بەهای دراوی ڤەنزوێلا کە بەرهەمی ڕاستەوخۆی بڕینی داهاتی نەوت بوو لەلایەن واشنتۆنەوە، هۆکاری سەرەکی ئەم کۆچە ملیۆنیەیە. ئەو “قوربانیی گەمارۆ” دەگۆڕێت بۆ “نەیاری سیاسی” تا پاساو بۆ هێرشەکەی ترەمپ بهێنێتەوە.
داگیرکاری سەربازی و پانتایی چەپ!
سەیرترین و مەترسیدارترین بەشی وتارەکەی تەقوایی ئەو بانگەشەیەیە کە دەڵێت “نەمانی مادۆرۆ ژینگەیەکی لەبار بۆ هێزە چەپەکان دروست دەکات” ئەمە تێنەگەیشتنێکی کوشندەیە لە مێژوو!
مێژووی دەستێوەردانی ئەمریکا لە ئەمریکای لاتین (لە چیلییەوە تا دەگاتە پەنەما و گواتیمالا) پێمان دەڵێت کە تانکی ئەمریکی “دیموکراسی” ناهێنێت، بەڵکو سیستەمێکی پۆلیسیی ڕاستڕەو جێگیر دەکات کە یەکەمین ئامانجی قڕکردنی هەر بزووتنەوەیەکی چەپ و کرێکارییە.
ئاخر چۆن “چەپێکی ڕادیکاڵ” دەتوانێت بڕوا بەوە بهێنێت کە هێرشی ئیمپریالیزم بۆ سەر کێڵگە نەوتییەکان، ڕێگە بۆ ئازادیی سۆسیالیستی خۆش دەکات؟ ئەمە گەمژەییەکی سیاسییە یان خۆبەدەستەوەدانێکی تەواو.
ڤەنزوێلا لەژێر سێبەری تاراندا: کورتکردنەوەی جیهان
تەقوایی ڤەنزوێلا تەنها وەك “پاشکۆیەك بۆ کۆماری ئیسلامی” دەبینێت. ئەو هەموو خەبات و مێژووی بزووتنەوەی بۆلیڤاری و دژایەتی خەڵکی ڤەنزوێلا بۆ هەژموونی ئەمریکا کورت دەکاتەوە بۆ “وەبەرهێنانی ئایەتوڵاکان”. ئەمە دیدگایەکی پان ئێرانیزمە کە بە ڕاستی “ئێران وەکو چەقی جیهان “دەبینێت. ئەم دیدگا کورتبینە؛ ناتوانێت جیهان لە دەرەوەی دوژمنە ناوخۆییەکانی خۆی ببینێت. ئەو ئامادەیە نەتەوەیەك بکاتە قوربانی تانکەکانی ئەمریکا، تەنها لەبەر ئەوەی گورزێک بەر هاوپەیمانێکی نێودەوڵەتیی کۆماری ئیسلامی بکەوێت!
ئەنجام: سیاسەت و دیسپلین
هێرشی سەربازیی سەر ڤەنزوێلا لە ساڵی ٢٠٢٦دا، وەک هەر داگیرکارییەکی تر، بۆن و بەرامەی نەوت و هەژموونی پێوەیە. حەمید تەقوایی بەم وتارە، نەك هەر لە لۆژیکی چەپ لایداوە، بەڵکو بووەتە بەشێك لەو مەکینە پڕوپاگەندەیەی کە داگیرکاریی بە “ڕزگاری” ناو دەبات.
مێژوو لەسەر ئەم “تراژیدیا”یە بێدەنگ نابێت؛ ناکرێت بانگەشەی ئازادیخوازی بکەیت و لە هەمان کاتدا چەپڵە بۆ تانکێک لێ بدەیت کە سەرەوەریی وڵاتێك پێشێل دەکات.