سەرچاوەیەکی بەرپرس لە وەزارەتی دارایی و ئابووری حکوومەتی هەرێمی کوردستان بۆ زێدپرێس ڕایگەیاند، بانکی بازرگانیی عێراق TBI بە فەرمی داوای کردووە بەشداری لە پڕۆژەی (هەژماری من) بکات و داواکارییەکەیشی بۆ ئەنجوومەنی وەزیران بەرز کراوەتەوە.
تا ئێستا پێنج بانکی کەرتی تایبەت بەشدارییان لە پڕۆژەی (هەژماری من)دا کردووە، کە پێکدێن لە (BBAC – NBI – RT – Cihan – IIB) و سەرجەمیان لەلایەن بانکی ناوەندییەوە دان پێدانراون و بەشداریکردنیان پەسەند کراوە. پێشتر بەرپرسانی حکوومەتی هەرێم ئاماژەیان بۆ ئەوە کردووە، ژمارەیەک بانکی دیکە بەشداری لە پڕۆژەکەدا دەکەن.
تۆمارکردنی فەرمانبەران و مووچەخۆران لە پڕۆژەی (هەژماری من) گەیشتووەتە ٢٦٠ هەزار کەس و ١٥٣ هەزار کارتیش بە تۆمارکراوەکان دراونەتەوە.
پێشتر مەسرور بارزانی سەرۆکوەزیرانی هەرێمی کوردستان ڕایگەیاندووە، تا کۆتایی ئەمساڵ هەژماری بانکی بۆ یەک ملیۆن مووچەخۆر دروست دەکرێت.
بەگوێرەی وەزارەتی دارایی و ئابووری حکوومەتی هەرێمی کوردستان هەر بانکێک دەتوانێت بەشداری لە پڕۆژەی (هەژماری من)دا بکات، بەڵام بەو مەرجەی ڕەزامەندی بانکی ناوەندی عێراقی هەبێت و مەرجەکانی پڕۆژەکەی تێدا بێت.
سەرچاوەکەی وەزارەتی دارایی و ئابووری گوتیشی، چاوەڕوان دەکرێت لە چەند ڕۆژی داهاتوودا ڕەزامەندی ئەنجوومەنی وەزیرانی هەرێمی کوردستان لەسەر بەشداریکردنی بانکی بازرگانی عێراق بە فەرمی ڕابگەیەندرێت.