یەكێك لەو ڕێنماییانە ئەوەیە كە كورته‌وتاره‌كانی دوای عەسر، بە لەبەرچاوگرتنی دۆخی گشتیی ڕۆژووەوانان، ٢٠ خوولەك بخایەنێت و تەنیا مامۆستای مزگەوت پێشكەشی بكات، بە بەكارهێنانی مایكرۆفۆنی ناوخۆیی مزگەوت، بابەتەكانیش بریتی دەبن لە خواپەرستی و مامەڵە و بابەتی پەروەردەیی و هۆشیاریی هەڵمەتی بەرەنگاربوونەوەی ماددە هۆشبەرەكان و هاندانی پێكەوەژیان.
لە خاڵێكی دیكەدا هاتووە، ماوەی نێوان ئیمساك و بانگدانی بەیانی بەپێی خشتەی پارێزگاكە دەبێت، كە دەبێت پێیەوە پابەند بن.
هەروەها تەنیا لە ١٠ شەوی كۆتاییەكانی مانگی ڕەمەزان، دەرگای مزگەوتەكان كراوە دەبن، تا نوێژی بەیانی بە مەرجی ڕەزامەندیی پێشنوێژ و وتارخوێنی مزگەوت.
ئەوەش باس كراوە هیچ كەس بۆی نییە جگە لە پێشنوێژ و وتارخوێنی فەرمیی مزگەوت، مەراسیمە ئایینییەكان و تەراویح بە تایبەتی ئەنجام بدات.
لە ڕێنماییەكی دیكەشدا دەڵێت: پاش بانگی شێوان (عیشا)، لە نێوان ١٥-٢٠ خوولەك دواتر نوێژ بكرێت، لەبەر بارودۆخی ڕۆژووەوان، ڕەچاوی كاتی گونجاو بكرێت لە ڕووی درێژی و كورتیی تەراویح، كە لەسەر بنەمای شەرعیی دروست ئەنجام بدرێت.
لەگەڵ ئەوەشدا كۆمەڵێك ڕێنماییی كارگێڕی بڵاو كردووەتەوە، كە ئاڕاستەی چێشتخانە و كافتریا و دەزگاكانی ڕاگەیاندن كراوە و داوا كراوە بە هەڵسوكەوتی دروست ڕێز لە مانگەكە بگرن.
