حکومەتی هەرێمی کوردستان، لە ڕاگەیەنراوێکی فەرمیدا، سەرکۆنەی توندی ئەو هێرشە تیرۆریستییەی کرد کە کەنیسەیەکی لە پارێزگای (کەرەک) لە شانشینی ئوردنی هاشمی کردە ئامانج، کە بەهۆیەوە ژمارەیەک هاووڵاتیی مەدەنی بوونە قوربانی و بریندار بوون. حکومەتی هەرێم نیگەرانی و هاوخەمی قووڵی خۆی بۆ ئەم ڕووداوە دەربڕی و بە پێشێلکارییەکی ئاشکرای بەها مرۆییەکان و ئازادیی خواپەرستی وەسف کرد.
لە ڕاگەیەنراوەکەدا کە ڕۆژی ٢٣ی تشرینی یەکەمی ٢٠٢٦ بڵاوکرایەوە، هاتووە کە حکومەتی هەرێم بە ته‌واوی هەموو جۆرەکانی تیرۆر، توندوتیژی و توندڕەوی ڕەت دەکاتەوە. ئاماژە بەوەش کراوە کە کردەووەی لەو شێوەیە و بەئامانجگرتنی پەرستگاکان، هەوڵێکن بۆ چاندنی تۆوی دووبەرەکی و نانەوەی ئاژاوە لەنێوان پێکهاتەکانی کۆمەڵگەدا، کە مەترسیی ڕاستەقینە بۆ سەر ئاشتیی کۆمەڵایەتی و پێکەوەژیانی ئایینی دروست دەکەن و دەرئەنجامەکەی تەنیا تێکدانی ئاسایش و سەقامگیری دەبێت.
حکومەتی هەرێمی کوردستان هاوسۆزی و پشتیوانیی تەواوی خۆی بۆ شانشینی ئوردنی هاشمی، بە سەرکردایەتی، حکومەت و گەلەکەی ڕاگەیاند. هاوکات پرسە و سەرەخۆشی ئاڕاستەی بنەماڵەی قوربانییان کرد و هیوای زوو چاکبوونەوەی بۆ بریندارانی ڕووداوەکە خواست.
لە کۆتایی ڕاگەیەنراوەکەدا، حکومەتی هەرێم جەختی لەسەر گرنگیی پەرەپێدان و پتەوکردنی هاریکاری و هەماهەنگیی هەرێمی و نێودەوڵەتی کردەوە، بە ئامانجی ڕووبەڕووبوونەوەی تیرۆر بە هەموو شێوەکانییەوە و پاراستنی ئاسایش و سەقامگیریی کۆمەڵگەکان.
