سەردار ئازاد- شارەزای بواری خانووبەرە
پێشبینی دەکرا دۆخی زەوی و خانوو باشتر بێت لە شووقە، بەڵام بڕیاری دابەشکردنی زەوی، کڕیارانی زەویشی دڕدۆنگ کردووە، چونکە دابەشکردنی زەوی وا دەکات زەویش وەک شووقە نرخی بشکێت بەهۆی زۆر بوونی خستنەڕوو لە بازاڕ و زۆربوونی فرۆشیاران کە بەخۆڕایی زەوییان وەرگرتووە و بەنرخی هەرزان دەیفرۆشنەوە.
دۆخی زەویوزار
ئێستا دۆخی زەویوزار لە هەرێمی کوردستان بەراورد بە ساڵانی ڕابردوو باش نییە، بەڵام هەموو پێشبینییەکان ئەوە دەردەخەن کە داهاتووی زەوی و خانوو لە هەرێمی کوردستان لە شووقە باشترە.
لەو دۆخەدا، کڕینی زەوی باشترە لە کڕینی شووقە، ئەوە بۆ قازانجی درێژخایەن و بۆ ئەو پارەیەی کە پێویستت نەبێت و بتەوێت وەبەرهێنانی تێدا بکەیت. باشترین شوێنیش بۆ کڕینی زەوی نیشتەجێبوون لە نێوان شەقامی 120 مەتری و 150مەتریی هەولێرە، بەتایبەت لە هەولێری نوێ تا بەحرکە.
دوخی زەوی بازرگانی
هەر کاتێک هەموو بەشەکانی سێکتەری خانووبەرە تووشی سستی و بێبازاڕی بوون، زەوی و باڵەخانەی بازرگانی دەبوژێنەوە، چونکە داهاتی بەردەوامیان هەیە کە کرێیە. بۆیە کڕینی زەوی بازرگانی باشترین بڕیاری کڕینی موڵکە ئەگەر پارەت هەبێت چ بۆ قازانج کە چەند بەرانبەری زەوی و شووقەیە چ بۆ داهات کە داهاتەکە باشترە.
دۆخی شووقە
شووقە دروستکردن لە هەرێمی کوردستان شۆڕشێک بوو کە وای کرد لەماوەیەکی کەمدا چەند هەزار شووقەیەک بفرۆشرێت و خەڵک بکڕێت، بەڵام خراپی کوالێتی و فڕوفێڵی عەقارات و بێخزمەتگوزاری هەندێک پڕۆژە و وەستان و هەڵاتنی هەندێک وەبەرهێنیی شووقە، دۆخی شووقەیان ئەوەندە خراپ تێکدا، کە پێویستی بە چەندین ساڵە تا بتوانرێت سومعە بۆ شووقە و عەقارات لە هەرێمی کوردستان بگێڕدرێتەوە. ئێستا تەنیا پڕۆژە بەکوالێتی و باشەکان بازاڕیی باشیان هەیە.
ئێستا تەنیا ئەو شووقانە بازاڕیان هەیە و کڕین و فرۆشتنیان پێوە دەکرێت کە تەواوبوونە و خەڵکیان تێدا نیشتەجێە، بەڵام بارودۆخی ئەو شووقانە باش نییە کە هەیکلن یان تازە سەرەتای دروستبوونیانە و کڕیار بە نرخی هەرزانیش بۆ ئەو شووقانە دەست ناکەوێت.
داهاتووی شووقە وابەستەیە بە کوالێتی و سومعەی خاوەن پڕۆژەکە و شوێنگە و کرێی شووقەکە؛ ئەوانە باش بوون داهاتووی باش دەبێت، بە پێچەوانەشەوە خراپ دەبێت.
