لەم دۆخەدا، كۆبوونەوەی كۆمەڵێك خەڵك لە دەوری دەسەڵات نەك كۆبوونەوەكی ئارەزوومەندانە نییە، بەڵكوو جۆرێكە لە سواڵكردن بە ناچاری، سواڵكردنێك ڕەنگە بتوانێت بڕێك پارە یان پۆستێكی كاتی بباتەوە، بەڵام دەبێت لە بەرانبەردا دۆڕانی خۆی قبوڵبێت و تا ماوە خاوەندارییەتی و بوونی خۆی بسڕێتەوە و تەسلیمی لق و مەڵبەندەكانی حزبی بكات!
نیشاندانی ئەم جۆرە حەشاماتە وەك دۆست و دەنگدەری حزب نەك نیشانەی زیندوویەتی و جەماوەری حزب نییە، بەڵكوو نیشانەی فەشەلی سیاسی و فكرییە، بەڵام لەسەر بودجە و دامودەزگا و پارەی گشتی، حزب وەك میزڵذانێک فووی تێدەكرێت، لەم دۆخەدا تەقینی میزڵدانە فووتێكراوەكە كارێكی گران نابێت، تەنها دەرزییەكی بچووكی پێویستە.
لەوبارەیەوە ڕۆژانە چیرۆكی جیاواز دەبیستین، بەشێكی زۆری ناوەڕۆكی ئەو چیرۆكانە لێدانە لە شكۆ و كەرامەتی مرۆڤ. لەوەش ترسناكتر ئاگاییەك دروست دەكرێت ئەو كەرامەت-شكاندنە وەك شكان تەماشا نەكرێت، بەڵكوو وەك دەرفەتێك بۆ ژیانێكی باشتری ماددی یان پلە و پۆستێك ببینرێت.
“هاوڕێ پێیان گوتم ئەگەر ببیتە حزبی ئەوە لە خوێندنی باڵا وەردەگیرێت بە دڵنیایییەوە هەر دوای تەواوكردنی خوێندنی باڵا، پۆستێكی باشیشت لەوێ لە پەیمانگا و زانكۆ پێ دەدەین، چاویش دەپۆشیین لە دەوامكردن و كەتنەكانیشت! ئەها فلانە كەس تۆش دەیناسی چووە ناو حزبی دەسەڵات، دەزانی چیان بۆیكردووە، هەر مەپرسە”.
لە فەرمانگەیەكی تر یەكێكی تر گوتی: “هاوڕێ پێیان گوتم ئەگەر ببیتە حزبی دەتكەینە بەڕێوەبەر و ئیمتیازاتی تریشت پێ دەدەین، ئەوە نییە تۆ بەهۆی بیروباوەڕی فكرییت نەیانكردیت بە دادنووس!”
جووتیارێكی گوندیش لەو لاوە گوتی: “هاوڕێ لە ناوچە پێیان گوتم مۆڵەتت دەدەین (بیری)ش لێ بدەیت بە نایاسایی” .
ئەمە چیرۆكی ڕۆژانەی خەڵكە، بەبێ بیركردنەوە لە گۆڕینی ئەم سیستەمە هیچ چارەیەكی ترمان نییە، گۆڕینی سیستەم فكر و پڕەنسیپێكی پێویستە كە لە قوڵایی فكری دادپەروەری و یەكسانییەوە سەرچاوەی گرتبێت نەك تەنها بە گۆڕینی دەم و چاوەكان، كە زۆرجار سەر بەهەمان سیستەمی كۆنن، بەڵام لێزانن لە میكاجكردن و جوانكاری.
مسلح شێخ ئیسلام دەڵێت: “من ئەو كەسەم هەموو ڕۆژێ/ هەی ژین هەی ژین/ ژیانی ئەمڕۆم دەفرۆشم بۆ كڕینی نانی سبەی …”، بەڵام لەم ژینگەی كاركردنەدا نەك ژیانی ئەمڕۆ هەندێك خەڵك وا لێكراوە ژیان و شكۆی ئەمڕۆ و سبەینێشی بفرۆشێت.
