کارزان عەزیز
لە دنیای ئەمڕۆدا، پۆپۆلیزمی لیبراڵ دیموكراسی تەنیا ڕۆڵی لە هێنانەسەر دەسەڵاتی كۆنەپارێز و باڵی ڕاستڕەودا نییە، بەڵكو بەرەنگارییشی كردووە بە گەمەیەكی سەرقاڵكەری كاتییانەی سۆشیاڵ میدیا.ئەوەی لە پشتی پۆپۆلیزمی میدیا و سۆشیاڵ میدیاوە هەیە هەر ئەو هێزانەن كە لە ڕێگەی سۆشیاڵ میدیا و گوتاری پۆپۆلیستانەوە دەسەڵاتیش دەگرنەدەست.
بەكارهێنانی سۆشیاڵ میدیا بۆ هێزە پۆپۆلیستەكان لە چەند خاڵێكدا خۆی دەبینێتەوە. یەك، بەكارهێنانی جەماوەریی. دوو، مۆبیلیزەكردنی جەماوەرێكی بەرفرەوان و لەم ڕێگەیەوە دەستكاریكردن و گۆڕینی ڕای گشتی. سێ، گوتارە بچووك و گرگن و شەخسییەكان متمانە بە گۆتار و زمان و ئایدیا و بەرژەوەندییە هاوبەشە مرۆییەكان لەق دەكەن، كە ئەمە پاڵنەرێكی گەورەیە لە جوڵانی هەست و سۆزی خەڵكدا، چونكە كار لەسەرە وەتەرە عاتفییەكانی جەماوەر بە گشتی دەكات. چوار و كۆتا، سۆشیاڵ میدیا لە پەیوەندییدا بە ژیریی دەستكرد و ئەلگۆریزمەكان دەتوانێت تەنانەت پەراوێزترین بینەرەكانی خۆی بدۆزێتەوە (دیمۆگرافیای ببینەر و بیسەر). سەرباری ئەوەی دەكرێت چەندین خاڵی دیكەش سەربار بكەین.
كەواتە، ئامرازەكانی پەیوەندیگرتنی پۆپۆلیزم لە فۆڕمی سۆشیاڵ میدیادا ئایدۆلۆژیای خۆی هەیە. سەرەتا، كارەكتەرە پۆپۆلیستەكان هەم وەك خۆیان و هەم وەك پاڵپشتیكراوانی دەسەڵات و هێزە پۆپۆلیستییەكان، سەرەتا لە ڕێگەی سۆشیاڵ میدیاوە پەیامەكانی خۆیان بڵاو دەكەنەوە و دەنگدانەوەیەكی گەورە پەیدا دەكەن، گورانی ئاماژەبۆكراوی پێشتر بە نموونە. دواتر میدیا تەقلیدییەكانیش تێیدەمروكێن و ئەم پەیامانە هەڵدەگرنەوە و دەنگۆیەكی گەورەتری بۆ دروست دەكەن، لە نموونەی كۆنگرە ڕۆژنامەوانییەكەی شێروان عەبدوڵا.
لەم ڕێگەیەوە، سۆشیاڵ میدیا لەناو ئایدیۆلۆژیای پۆپۆلیستی هاوچەرخدا، هەموو شتێك قووت دەدات و هەڵدەلوشێت و وەك چالاكییەكی تەنیا وێنەیی سەر پلاتفۆمە كۆمەڵایەتییەكانەوە تفی دەكاتەوە.
فەیلەسوفێكی وەك بۆدریارد هەر لە جەنگی كەنداوەوە توانای ئەم میدیا نوێیەی بۆ دەركەوت، بۆیە پێیوابوو كە جەنگی كەنداو ڕووینەداوە، چونكە تەنیا وەك جەنگێكی بەشاشەكراو لە سی ئێن ئێنەوە بینراو و هیچی تر. لەسەر ئەم بنەمایە و كاتێك دەبینین كارەساتەكان بە ڕاستی ڕوودەدەن و هیچ بەرهەڵستی و بەرەنگارییەكی واقعی لەدایك نابێت، لە نموونەی دەستوەردانی بێسنووری سروشت لە ڕێگەی كۆمپانیاكانی یەكێتی و پارتی و نیولیبرالیزمەوە، ئەوا دەكرێت بڵێین كارەساتەكان تەنیا لەناو سۆشیاڵ میدیا و لەسەر شاشەی مۆبایلەكان ڕوودەدەن.
دەرئەنجام، نغرۆبوونی كۆمەڵگا لەناو پۆپۆلیزمی هاوچەرخی سۆشیاڵ میدیادا ئومێدی ڕزگارییەكی تێدا بەدی ناكرێت. لەبەرانبەردا، ئەوە تەنیا ئاكتی ڕادیكاڵ و شۆڕشگێڕانەیە دژ بە نیولیبرالیزم كە دەتوانێت لەم پۆپۆلیزمە میدیاییە و كارەساتەكان بە ڕاستی بەخەبەرمان بهێننەوە.
