سیروان محەمەد، بریكاری وەزیری پلاندانانی حکومەتی هەرێمی کوردستان، دەڵێت، هەرێمی کوردستان ڕێژەی ١٢.٦٧٪ی دیاریکراو بۆ پشکی هەرێم لە بودجەی گشتیی عێراق قبوڵ ناکات و ئەگەر گفتوگۆکان بۆ چارەسەرکردنی کێشەکە بە ئەنجام نەگەن، حکومەتی هەرێم ڕێگای یاسایی دەگرێتەبەر.
سیروان محەمەد لە لێدوانێک بۆ ماڵپەڕی فەرمیی پارتی دیموکراتی کوردستان، باس لە نووسراوێکی وەزارەتی پلاندانانی عێراق دەکات کە بۆ دامەزراوە و دەزگاکانی حکومەت نێردراوە و تێیدا داوا کراوە ئەنجامەکانی سەرژمێری گشتیی ساڵی ٢٠٢٤ لە پلاندانان و بەرنامەکانی دامەزراوە حکومییەکان لە ئاستی فیدراڵ و هەرێمی بەکاربهێنرێن.
بەپێی قسەکانی ئەو، لەگەڵ نووسراوەکەدا خشتەیەک هەیە کە حکومەتی هەرێم لە ناوەڕۆک و شێوازی هەژمارکردنی داتا و ڕێژەکانی تێدا گومان هەیە. ئەو دەڵێت خشتەکە لەگەڵ بڕیارەکانی ئەنجوومەنی وەزیرانی هەرێم ناگونجێت و بۆیە ئەنجوومەنەکە بابەتەکەی خستووەتە ناو بەرنامەی کاری خۆی.
یەکێک لە خاڵە سەرەکییەکانی ناڕەزایی حکومەتی هەرێم، بە وتەی سیروان محەمەد، شێوازی هەژمارکردنی دانیشتووانە. ئەو دەڵێت لە هەرێمی کوردستان ژمارەیەکی زۆر ئاوارە و پەنابەر هەن، لەگەڵ ئەو هاووڵاتییانەی لە پارێزگا جیاوازەکانی عێراقەوە بۆ هەرێم هاتوون. بە وتەی ئەو، ئەم گرووپانە لە هەژمارکردنی دانیشتوواندا بە شێوەیەک مامەڵەیان لەگەڵ کراوە کە کاریگەری لە کەمکردنەوەی ژمارەی دانیشتووانی هەرێم هەیە.
سیروان محەمەد هەروەها ئاماژە بە ناوچە کوردستانییەکان دەکات و دەڵێت حکومەتی هەرێم پێشتر داوای کردبوو لە هەندێک لەو ناوچانەدا سەرژمێری نەکرێت یان گواستنەوەی دانیشتووان بۆ ناوچەکە لە داتاکاندا بە وردی جیا بکرێتەوە. بە وتەی ئەو، ئەم پێشنیارە قبوڵ نەکراوە و خشتەیەک بۆ تۆمارکردنی ئاوارە، پەنابەر و ئەو کەسانەی لە پارێزگاکانی دیکەوە هاتوون، بۆ دابینکردنی ڕوونیی داتا، ئامادە کراوە؛ بەڵام حکومەتی هەرێم دەڵێت ئەو خشتەیە بە شێوەی پێویست جێبەجێ نەکراوە.
بریكاری وەزیری پلاندانانی هەرێم دەڵێت بەپێی ئەو ڕێژەیەی لەلایەن بەغداوە دیاریکراوە، پشکی هەرێم لە بودجەی گشتیی عێراق **١٢.٦٧٪**ە، لە کاتێکدا حکومەتی هەرێم ئەو ڕێژەیە بە پێوەرێکی دروست بۆ هەژمارکردنی پشکی هەرێم نازانێت.
بەپێی لێدوانەکەی، حکومەتی هەرێم هەوڵ دەدات ڕێژەکە بۆ ١٤.١٤٪ بەرز بکرێتەوە و ئەگەر لە گفتوگۆکاندا ڕێککەوتنێک بەدەست نەهێنرێت، هەرێم ئامادەیە بۆ چارەسەرکردنی کێشەکە ڕێگای یاسایی بگرێتەبەر.
سیروان محەمەد دەڵێت بەڵگەکانی حکومەتی هەرێم لەسەر ئەم بابەتە بەهێزن و لە کۆتاییدا ئەگەر پێویست بکات، دادگای فیدراڵی عێراق دەتوانێت لەسەر ناکۆکییەکەی نێوان هەرێمی کوردستان و حکومەتی فیدراڵی بڕیار بدات.
ئەنجامە سەرەتاییەکانی سەرژمێری گشتیی دانیشتووان و نیشتەجێبووانی عێراق، کە لە ٢٠٢٤ بەڕێوەچوو، بووەتە بنەمای گفتوگۆی نوێ لەسەر دابەشکردنی سەرچاوە و پشکی بودجەی هەرێمی کوردستان. لە ڕاپۆرتێکی پێشوودا، بە پشتبەستن بە ئەنجامەکانی سەرژمێری، ژمارەی دانیشتووانی هەرێمی کوردستان نزیکەی ٦.٥ ملیۆن کەس هەژمار کراوە، بەڵام سیروان محەمەد جەختی لەوە کردووەتەوە کە هەژمارەکە پێویستی بە تەواوکردن و ڕوونکردنەوەی هەندێک داتا هەیە.
