ئەمڕۆ شەممە، ٢٦ی تەممووزی ٢٠٢٥، لە ڕاگەیەندراوێکی تایبەتدا، وەزارەتی خوێندنی باڵا و توێژینەوەی زانستی حکوومەتی هەرێمی کوردستان سەرکۆنەی بڕیاری وەزارەتی خوێندنی باڵای حکوومەتی عێراقی فیدڕاڵ کرد بۆ ڕێگرتن لە (خوێندن و دانانی پرسیار) بە زمانی کوردی لە زانکۆکانی (مووسڵ، کەرکووک و دیالە).
وەزارەتی خوێندنی باڵا دەڵێ: “ئەم بڕیارە لەگەڵ ئەوەی پێشێڵکردنی ڕاستەوخۆی مادەی (٤)ی دەستووری هەمیشەیی عیراقە، لە هەمانکاتدا پێچەوانەی بەها و بنەماکانی پێکەوەژیانە لە چوارچێوەی دەوڵەتی عێراقی فیدڕاڵ”.
لەو ڕوانگەیەوە، داوا لە وەزارەتی خوێندنی باڵای عێراق دەکات: “دەستبەجێ ئەو بڕیارە هەڵبوەشێنێتەوە و کار بکات بۆ ئەوەی زانکۆکان و دامەزراوەکانی خوێندنی باڵا ببنە ناوەندی پێکەوەژیان و ڕێزگرتن لە کەلتوور و زمان و فەرهەنگی هەموو گەلانی عێراق بەبێ جیاوازی”.
زیاتر دەڵێ: “بۆ ئەم مەبەستەش لەگەڵ لایەنە پەیوەندیدارەکانی حکوومەتی عێراق لەسەر هێڵ دەبین بۆ چارەسەرکردنی ئەم پرسە و ڕێگەگرتن لە دووبارەبوونەوەی ئەم جۆرە هەڵوێستە دوژمنکارانە”.
لەلایەکی دیکەوە، هەر ئەمڕۆ شەممە، د. ئارام قادر وەزیری خوێندنی باڵا و توێژینەوەی زانستی، لە پەیامێکدا ڕایگەیاند: “ئەم بڕیارەی وەزارەتی خوێندنی باڵای حکوومەتی فیدڕاڵی بۆ قەدەغەکردنی میکانیزمی وەرگێڕانی پرسیارەکان لە تاقیکردنەوەکان و وانەگوتنەوەکاندا، دژ بە پڕەنسیپەکانی پێکەوەژیان و ڕێزنەگرتنیشە لە کەلتوور و فەرهەنگی نەتەوە ناعەرەبەکانی ناو دەوڵەتی عێراقی فیدڕاڵ”.
د. ئارام قادر دەڵێ: “بەتوندی سەرکۆنەی دەکەم و گەڕانەوەیەکی مەترسیداریشە بۆ کەلتووری بەعسیزم و ناوەندگەرایی، کە ئەو قۆناغە لە زیهنییەتی گەلانی عێراقدا ڕاپێچی ناو ئەرشیڤەکانی مێژوو کراون”.
زیاتر دەڵێ: “پێویستە هەموو لایەک ئەو ڕاستییە باش بزانن کە هەر کەس و لایەنێک ڕێز لە کەلتوور و زمان و فەرهەنگی نەتەوەکەمان نەگرێت، ئێمەش بەهەمان پڕەنسیپی «العین بالعین، والسن بالسن» مامەڵە لەگەڵ فەرهەنگ و کەلتوور و زمانیان دەکەین”.
وەزارەتی خوێندنی باڵا و توێژینەوەی زانستی عێراق، لە ١٦ی تەممووزی ٢٠٢٥ بڕیارێکی دەرکردووە، کە بەکارهێنانی زمانی کوردی، لە سەرجەم زانکۆ حکوومی و ناحکوومییەکانی ناوچە کوردستانییە دابڕێندراوەکان قەدەغە دەکات.
