زێدپرێس
ئەمڕۆ سێشەم، ٢ی کانوونی دووەمی ٢٠٢٤، ئەنجوومەنی سەرتاسەری مامۆستایانی ناڕازی ڕاگەیەندراوێکیان لەمەڕ لێدوانی جێگری بەڕێوەبەری گشتی پەروەردەی سلێمانی بڵاوکردەوە، کە ئاماژەی بەوە کردووە، لەگەڵ مامۆستایانی ناڕازی کۆبوونەتەوە و هەردوولا پێیان باش بووە دەوام دەستپێبکاتەوە.
لە ڕاگەیەندراوەکەدا هاتووە “ئێمە وەکوو ئەنجوومەنی سەرتاسەریی مامۆستایانی ناڕازیی، لە کاتێکدا ئەم جۆرە لێدوانانە بە نابەرپرسانە و ناڕاست دەزانین، بێبەرین لەهەموو کۆبوونەوەیەکی لەم شێوەیە و بەهەموو شێوەیەک ڕەتی دەکەینەوە”.
زیاتر دەڵێ “هاوکات دووپاتی دەکەینەوە، بەردەوامین لە بایکۆت و تا داواکارییەکانی ناو دوا یاداشتمان، کە لەسەر گڵکۆی شەهیدی قەڵەم و حەقبێژ مامۆستا هێرش خوێندرایەوە و ئاڕاستەی لایەنە پەیوەندیدارەکانمان کردووە، خۆی لە پێنج خاڵی سەرەکیدا دەبینێتەوە، جێبەجێ نەکرێن، بەهیچ شێوەیەک بایکۆت ناشکێنین و دەرگای ناوەندەکانی خوێندن ناکەینەوە”.
ئەنجوومەنی سەرتاسەری مامۆستایانی ناڕازی، لە هەمان ڕاگەیەندراودا ئاماژە بەوە دەکەن: “لەنزیکترین کاتدا هەنگاوی کردەی دەنێین بۆ ئەنجامدانی چالاکی مەدەنی لە هەموو ئاستەکان و درێژە بە ناڕەزایەتییەکانمان دەدەین و میکانیزمی جۆراوجۆر و ڕێگای جیاوازی مەدەنی دەگرینە بەر لەپێناو گەشتن بە ئامانجەکانمان و جێبەجێکردنی داواکارییەکانمان”.
