وەزارەتی بازرگانی و پیشەسازی حکوومەتی هەرێم، ئاماری بەڕێوەبەرایەتییەکانی سەربە بەڕێوەبەرایەتی گشتی بازرگانی، لەماوەی شەش مانگی یەکەمی ٢٠٢٤ ڕاگەیاند و بەگوێرەی ئامارەکەیش، لەو ماوەیەدا ٨٠ هەزار و ٣٩٩ ئۆتۆمبێل لە ڕێگەی پێسنای ٤٥٧ مۆڵەتەوە هاوردەی هەرێمی کوردستان کراوە/
بەڕێوەبەرایەتی پێشانگا و خزمەتگوزارییە بازرگانییەکان، بەرپرسیارە لەپێدانی مۆڵەتی هاوردە و هەناردەکردن لە هەرێمی کوردستان، کە لە ڕێگەی دەروازە سنورییەکانی ئیبراهیم خەلیل، حاجی هۆمەران، پەروێزخان، باشماخ و هەردوو فڕۆکەخانەی نێودەوڵەتی هەولێر و سلێمانییەوە ئاڵوگۆڕ دەکرێن.
هەر لەو شەش مانگەدا، ٢٧١ هەزار و ٣٧٨ تۆن و حەوت ملیۆن و ٥٣١ هەزار و ٤٩ کیلۆگرام کاڵا و کەلوپەل بە بەهای سێ ملیار و ٢٢٠ ملیۆن و ٦٠ هەزار دۆلاری ئەمریکی لەڕێگەی هەزار و ٨٠٢ مۆڵەوە، هاوردەی هەرێمی کوردستان کراون. لە بەرانبەردا، ٥٥ هەزار و ٦٧٢ تۆن و هەروەها ٥٢ هەزار و ٩٩٤ کیلۆگرام کاڵا و کەلوپەل لە ڕێگەی ٩٦ مۆڵەتەوە، هەناردەی دەرەوە کراون.
وەزارەتەکە ڕوونی کردووەتەوە، لەو ماوەیەدا، دوو هەزار و ٨٩٨ ناسنامەی بازرگانی بەو کەسانە دراون کە بەڕێوەبەری ڕێپێدراوی کۆمپانیاکانی هاوردە و هەناردەکردن یان خاوەن کارگە و پڕۆژەکانی بازرگانی و پیشەسازیین.
بەڕێوەبەرایەتی چاودێری بازرگانی لە هەولێر، سلێمانی، دهۆک و ئیدارە سەربەخۆکان لەڕێگەی تیمی مەیدانی چاودێری نرخی کاڵا و دۆخی بازاڕ و پڕۆژە بازرگانییەکان دەکات.
لەو چوارچێوەیەشدا، تیمە مەیدانییەکان ٢٦ هەزار و ٢٤٩ سەردانیان کردووە و هەزار و ٧٢٨ سەرپێچییان تۆمار کردووە؛ ١٤٣ شوێنکار سزا دراون و ١٠٦ شوێنکاریشیان داخستووە.
هەر لەو شەش مانگەدا، ٢٦٧ تۆن خۆراکی بەسەرچوو دەستی بەسەردا گیراوە و بە بڕی ٢٢٧ ملیۆن و ٤٣٦ هەزار و ٢٠٠ دینار پسوولەی سزا بۆ شوێنکارەکان دەرکراوە.
هەرچی پەیوەندی بە ئامارەکانی بەڕێوەبەرایەتی دروستکراوی دانەوێڵە، لە شارەکانی هەولێر، دهۆک و سلێمانی هەبێت، کە کارەکانی بریتییە لە وەرگرتنی گەنم لە کۆمپانیای بازرگانی دانەوێڵە و دروستکردنی ئارد و دابەشکردنی بەسەر نزیکەی سێ بریکاردا.
لەماوەی شەش مانگی سەرەتای ئەمساڵدا، پێنج بەشە ئارد دابەشکراوە؛ مۆڵەت بە ١٨ سەموونخانە و ٦٢ نانەواخانە دراوە، لەسەر ئەو بنەمایەش کۆی گشتی سەموونخانەی تۆمارکراو هەزار و ٧٩٨ سەموونخانە و دوو هەزار و ٨٥٥ نانەواخانە و هاوکات ٣٣٧ شیرینخانە مۆڵەتیان پێدراوە.
بەڕێوەبەرایەتی بازرگانی دانەوێڵە لەهەولێر و سلێمانی و دهۆک بەگشتی سەرپەرشتی پڕۆسەی وەرگرتنی گەنمی جووتیاران دەکات لە هەریەکە لە سایلۆکانی حکوومەت کە لەگەڵ کۆمپانیای بازرگانی دانەوێڵەی سەربە حکوومەتی فیدڕاڵ گرێدراون.
لە هەولێر سایلۆکانی هەولێر و قوشتەپە، لە سلێمانی سایلۆکانی پیرەمەگروون، چەمچەماڵ، ڕاپەڕین، سەیدسادق، کەلار و بنکەی هەڵەبجە؛ لە دهۆک سایلۆکانی فایدە، شێخان و زاخۆ هەن.
توانای تێکڕای ئەمبارکردنی سایلۆکان ٤٨٥ هەزار تۆن دەبێت و لە وەرزی بەبازاڕکردنی گەنمی ئەمساڵدا، زیاتر لە ٦٨٥ هەزار تۆن گەنمیان وەرگرتووە.
هەروەها، بەڕێوەبەرایەتی پسوولەی خۆراک، کە کاری ڕێکخستن و لادان و زیادکردنی ژمارەی دانیشتوان و ئەندامانی خێزانە بۆسەر پسوولەی خۆراک، بە گشتی یەک ملیۆن و ٣٠٥ هەزار و ٣٧٣ خێزانیان تۆمار کردووە، کە پێنج ملیۆن و ٣٤٨ هەزار و ٢٣٣ کەس و سێ هەزار و ٢٦٦ منداڵ لەخۆدەگرێت.
بەڕێوەبەرایەتی بازرگانی کەلوپەلی خۆراک، سەرپەرشتی کاری دابەشکردنی بەشە خۆراکی مانگانەی هاووڵاتییان دەکات لە ڕێگەی شەش هەزار و ٥٢٤ بریکارەوە کە تا ئێستا تۆمارن و لەمساڵدا تەنیا ١٣ بریکارنامەی خۆراک بەخشراوە؛ بۆ ئەمساڵ چوار بەشەخۆراک نێردراوە و دابەشکراوە.
