کەمێک پێش ئێستا لەسەر بانگەوازی مەڵبەندی هەولێری حزبی شیوعی کوردستان خۆپیشاندانبۆ پاڵپشتی لە داخوازی و نیگەرانییەکانی مامۆستایان و فەرمانبەران دەستی پێکرد.
بەیانی ئەمڕۆ دووشەم، ٤ی شوباتی ٢٠٢٤ لەبەردەم مەڵبەندی هەولێری حزبی شیوعی کوردستان خۆپیشاندان بۆ پاڵپشتی لە داخوازییەکانی مامۆستایان و فەرمانبەران دەستی پێکرد و هێزێکی زۆری ئەمنییش دەوری خۆپیشاندەران و بارەگای مەڵبەندی هەولێری حزبەکەیان داوە.
دوو ڕۆژی ڕابردوو مەڵبەندی هەولێری حزبی شیوعی بانگەوازێکیان بۆ ئەنجامدانی خۆپیشاندان و دەربڕینی ناڕەزایەتی لەبەردەم ئەنجوومەنی وەزیران بڵاوکردەوە و بڕیاربوو ئەمڕۆ خۆپیشاندانەکە لە بەردەم ئەنجوومەنی وەزیران بەڕێوە بچێت، بەڵام بەهۆی ڕێگری هێزە ئەمنییەکانەوە، جەماوەر و لایەنگرانی حزبەکە و ژمارەیەک لە مامۆستایان و فەرمانبەران و خانەنشینان لەبەردەم بارەگای مەڵبەندی حزبەکە گردبوونەتەوە و دروشمی پاڵپشتی لە داخوازییەکانی خەڵک و دژ بە دۆخی حوکمڕانی لە هەرێمی کوردستان دەڵێنەوە.
