ڕێبوار کەمال
یەكێك لەو بابەتە هەرە گرنگ و پێویستانەی لە بونیاتنان و فرەوانكردنی شار و شارۆچكەكان دەبێت حساباتی وردی ژینگەییانەی تێدا بكرێت، بابەتی ئایندەی ژینگە و ڕووبەڕووبوونەوەی ڕووداوە سروشتییەكانە.
لای بەشێك لە شارەزایانی ژینگە هۆكاری پیسبوونی ژینگەی شاری (تاران)ی پایتەختی ئێران دەگەڕێتەوە بۆ ئەوەی لە فرەوانبوون و پەرپێدانی كەرتی پیشەسازی لەو ناوچەیە، مەسەلە ژینگەییەكەی فەرامۆش كراوە و بەهەند نەگیراوە، تەنانەت كەرتی پیشەسازی و کارگەكانی ئەو ناوچەیە بەجۆرێك بونیاد نراوە، ئاڕاستەی با بە بەردەوامی گازە پیسبووەكان بەڕووی ناوچەی نیشتەجێبووەكاندا دەهێنێت كە دەبوو پێچەوانەی ئەمە بونیاد بنرایە.
ئێستا بایەخدان بە بابەتی ژینگە لە بونیاتنان و فرەوانبوونی شارەكان پێویستە سەرەكیترین و گرنگترین بنەمای لێكۆڵینەوەكان بێت.
لافاو ئەو بڕە ئاوەیە كە لە ئەنجامی بڕێكی زۆر دابارین ڕوودەدات و پانتایی زەوی ناوچەكە توانای هەڵمژینی ئەو بڕەی نابێت و جوڵە و بڕی ئاو زیاد دەكات، جگە لە چۆم و ڕاڕەوە ئاوییەكان زۆر جار لە گەڕەك و شەقام و كوچە و كۆڵان و سەرەو لێژەكان دروست دەبێت.
ئەو هۆكارانەی كە دەبنە هۆی كەمكردنەوە و لاوازكردنی لافاو:
- ڕووبەری سەوزایی: ڕووبەری ڕووەكی یاخود درەختی (دارستان) ئەو ناوچانەی كە دەوڵەمەندە بە ناوچەیەكی چڕی درەخت یاخود ڕووەكە ئاڵفییەكان كە پاشماوە وەریوەكانی وەك گەڵا و باقی ئەندامە وەریوەكانی ڕووەك و درەخت وا دەكات ئەم ناوچانە نزیك دە بەرانبەری ناوچەی ڕووتەنی و ناوچەكانی دیكە توانای هەڵمژین و گلدانەوەی ئاوی هەبێت، هەروەها ڕەگی درەخت و ڕووەك ڕێگا دروست دەكەن بۆ گلدانەوەی ئاو لە ناو قوڵایی خاك، لاشەی درەخت و ڕووەك لەكاتی سەوزی و لەكاتەكانی دیكەیش بڕێكی باش ئاو لە كاتی دابارینەكان لە خۆدەگرێت و پاشان بەهێواشی دەڕژێتە خاكەوە، كە ئەمە وا دەكات ڕێگرییەكی باش بكات لە دروستبوونی لافاو.
- قوڵی خاكی دروست بوو واتە ئەو چینەی كە دروست بووە و پێی دەگوترێت خاك یەكێكی دیكەیە لە هۆكارەكان، كە ڕووبەرە سەوزاییەكان یارمەتیدەرێكی باشی دروستبوونی خاكن، تا قوڵی خاك زیاتر بێت گلدانەوەی ئاو زیاد دەكات و ئەگەری لافاو كەم دەكات.
- ڕێژەی ڕووبەری سەوزایی و پارك و ناوچەی گڵیین(خاكی)، واتە تا ناوچەی قیڕ و شۆستە و پانتاییە دەستكردەكان زیاتر بێت ئەگەری لافاو زیاد دەكات و بڕی ئاوی ڕۆشتوو بۆ ناو خاك كەم دەكات.
- هەڵكەوتەی جوگرافیایی و پێكهاتەی چینەكانی خاك و ڕێژەی كوترانەوەی خاك: ئەمانەیش هۆكاران بۆ ئەگەری زیادبوونی لافاو.
فرەوانبوونی شاری سلێمانی بەرەو بەرزاییەكانی شار لە ئایندەدا دەبێتە یەكێك لە هۆكارەكانی زیادبوون و مەترسی لافاو لە بەشی خوارەوە و پیسبوونی ژینگەی هەوای شارەكە.
ئەو فرەوانبوونەی شاری سلێمانی بەرەو بەرزاییەكانی گۆیژە دەبێتە هۆی لە ناوچوونی ئەو ڕووبەرانەی ئاماژەم پێكرد و لە كاتی دابارینی بڕی زۆر بەتایبەت لەماوەیەكی كەمدا، ئەو كات ڕاڕەوە ئاوییەكان توانایان سنوردارە و لە ناوچەی ناوەندی شار و خوارووی شار مەترسییەكانی لافاو زیاد دەكات.
هەروەها بەرزاییەكانی سلێمانی بە ڕووپۆشە سەوزاییەكەیان و كەمێك دارستانی دەستكردن كە هەیانە گرنگترین كاراكتەری جێگۆڕكێی هەوان لە سلێمانی، كە لە شێوەی شەوانە ڕۆژی هەوای پیس بوو و گەرم بوو (بە هۆی جوڵەی مرۆڤەكان) لە نزماییەكان هەڵكشان دەكات و بەرەوە بەرزاییەكانی شار و پاشان هەوای پاك و فێنكی ناوچە بەرزاییەكان بە ئاڕاستەی نزماییەكان دێت و ئەم كردارە بەردەوام دووبارە دەبێتەوە.
كەواتە دەبێت بیر لەوە بكرێتەوە چیتر بەهیچ جۆرێك ئاڕاستەی فرەوانبوونی شاری سلێمانی بەرەو بەرزاییەكان نەبردرێت تا لە مەترسی لافاو پارێزراو بین و لەو هەوا پاك و فێنكەی بەرزاییەكانی گۆیژە بێبەش نەبین، بەڵكوو دەبێت هەوڵ بدرێت ڕێژەی سەوزكردنی زیاتر بكرێت، پارێزگاری لێ بكرێت و خزمەتی زیاتر بكرێت.
جێی ئاماژەیە بەشێكی زۆر لە لافاو و لادانی ئاوەكان بە هۆی گۆڕینی ڕاڕەوی ئاوەكان و لەناوبردنی پێكهاتەی چەمەكان و تێكدان و لەناوبردنی دارستان و پاوانه‌كانه‌وەیە.
