بەگوێرەی ئامارە فەرمییەکانی ئیدارەی سەربەخۆی زاخۆ، لەماوەی شەش ڕۆژی پیشانگای نێودەوڵەتیی کتێب لە زاخۆ، نزیکەی ٥٤ هەزار کەس سەردانی پیشانگاکەیان کردووە و زیاتر لە ٣٧ هەزار کتێبیش فرۆشراون.
گوهدار شێخۆ سەرۆکی ئیدارەی سەربەخۆی زاخۆ لە کۆنگرەیەکی ڕۆژنامەوانیدا ڕایگەیاند، لەماوەی شەش ڕۆژی یەکەمین پیشانگای نێودەوڵەتیی کتێب لە زاخۆ، ٥٣ هەزار و ٩٣٤ کەس سەردانی پیشانگاکەیان کردووە و ٣٧ هەزار و ٢٦٣ کتێب فرۆشراون.
یەکەمین پیشانگای نێودەوڵەتیی کتێب لە زاخۆ و دەڤەری بادینان لە ١ی کانوونی دووەمی ٢٠٢٥ تاوەکوو ٦ی کانوونی یەکەمی ٢٠٢٥ بە بەشداری دەیان ناوەندی چاپ و بڵاوکردنەوە لە هەرێمی کوردستان، وڵاتانی عێراق، ئێران، تورکیا، سووریا و وڵاتانی دیکەی عەرەبی و نێودەوڵەتی بەڕێوەچوو.
ئەوە یەکەمین پیشانگای نێودەوڵەتیی کتێب بوو لە سەرتاسەری دەڤەری بادیناندا و وەک چالاکییەکی گەورەی ڕۆشنبیری و کەلتووری، دەنگدانەوەیەکی گەورەی دروست کرد و لەلایەن خەڵکەوە پێشوازییەکی بەرفرەوانی لێ کرا.
ناوەندەکانی بەشدار لە پیشانگاکە و دەستەی سەرپەرشتیارانی پیشانگا، ئەزموونەکەیان بە سەرکەوتوو لەقەڵەم دا و چاوەڕوان دەکرێت ساڵانی داهاتوو، بە هەمان شێوە پیشانگای نێودەوڵەتیی کتێب لە زاخۆ بکرێتەوە.
تاوەکوو ئێستا، ساڵانە لە هەولێری پایتەختی هەرێمی کوردستان و لە شاری سلێمانی پیشانگای نێودەوڵەتیی کتێب دەکرێنەوە و زاخۆ سێیەمین ناوەندی هەرێمی کوردستانە کە پیشانگای نێودەوڵەتیی کتێبی تێدا دەکرێتەوە.
