بەگوێرەی بەدواداچوونێکی ڕێکخراوی دیدار، لە چوارچێوەی پڕۆژەی پردی پەیوەندی ھاووڵاتییان و نوێنەرانی پارێزگای ھەولێر لە ئەنجوومەنی نوێنەرانی عێراق، نزیکەی ٢٥٠ جووتیاری سنوری پارێزگای هەولێر، کە لە ساڵی ٢٠١٥-٢٠١٦ گەنمەکەیان ڕادەستی سایلۆی هەولێر کردووە، هێشتا پارەیان پێنەدراوە.
ڕێکخراوەکە، ئاماژەی بەوە کردووە، ئەو هەواڵ و دەنگۆیانەی دەڵێن تەواوی جووتیاران پارەی گەنمی ٢٠١٥-٢٠١٦یان وەرگرتووە، دوورن لەڕاستییەوە، لەکاتێکدا نزیکەی ٢٥٠ جووتیاری هەولێر، نۆ ساڵە دەستی دەستیان پێدەکرێت و پارەی گەنمەکەیان پێنادرێت.
ڕێکخراوەکە لە ڕاگەیەندراوێکدا ڕوونیکردووەتەوە، سەرجەم بەڵگە و چەکە داراییەکانی ئەو جووتیارانە لە سایلۆی هەولێرە، بەڵام نۆ ساڵە دەستی دەستیان پێ دەکرێت و بەگوێرەی بەدواداچوونەکانیان، لەگەڵ سایلۆی ھەولێر و بەڕێوەبەرایەتی گشتی بازرگانی، تا ئێستا لایەنی کەمتەرخەم دیاری نەکراوە و بیانووی حکوومەتی عێراق بۆ نەناردنی پارەی ئەو ٢٥٠ جووتیارە، “ھەڵەی سایلۆ و لایەنەکانی تری ھەرێم بووە”.
لە ڕاگەیەندراوەکەدا هاتووە “ئێستا پاش چەندین ساڵ ٢٥٠ جووتیار باجی ھەڵەی سایلۆ و لایانەکانی تری ھەرێم دەدەن”.
ڕێکخراوەکە هەروەها داوای لە جووتیارەکان کردووە، پەیوەندییان پێوە بکەن بۆ بەردەستخستنی ئامارێکی ورد و بەئامانجی دروستکردنی گوشار لەڕێگەی داواکاری گشتی و دەستەی دەستپاکی و نوێنەرانی پارێزگای ھەولێر لە ئەنجوومەنی نوێنەرانی عێراق بەمەبەستی دۆزینەوەی چارەسەرێک بۆ کێشەکە و گێڕانەوەی مافی جووتیارانی بێبەشکراو لە شایستە داراییەکانیان.
