وەزارەتی بازرگانی و پیشەسازی حکوومەتی هەرێمی کوردستان ڕایگەیاند، دوێنێ شەممە، ٢٠ی تەممووزی ٢٠٢٤ دوا ڕۆژی وەرگرتنی گەنمی جووتیاران بوو لە سایلۆکانی هەرێمی کوردستان، کە لە ٦ی حوزیرانی ٢٠٢٤ دەستی پێکرد و ماوەی ٤٥ ڕۆژ بەردەوام بوو.
بەگوێرەی ڕاگەیەندراوی وەزارەتەکە، هەرچەند بڕیاربوو ٧٠٠ هەزار تۆن گەنم لە جووتیارانی هەرێمی کوردستان وەربگیرێت؛ سلێمانی، ٢٨٢ هەزار تۆن؛ هەولێر، ٢٢٨ هەزار تۆن و دهۆک ١٨٩ هەزار تۆن، بەڵام تەنیا ٦٨٥ هەزار تۆن وەرگیراوە، بەم شێوەیە:
سلێمانی؛ بڕی (٢٧٧،٤٥٩.٤٢٠) هەزار تۆن.
هەولێر؛ بڕی (٢٢٢،١٥٩.٧٦٠) هەزار تۆن.
دهۆک؛ بڕی (١٨٦،٣٥٥.٧٦٠) هەزار تۆن.
وەزارەتی بازرگانی و پیشەسازی ئاماژەی بەوەش کردووە، زیاتر لە ١٤ هەزار تۆن کە نەتوانراوە لە جووتیاران وەربگیرێت، بەپێی ئەو مەرجانە نەبووە کە وەزارەتی بازرگانی حکوومەتی عێراق دیاریکردووە.
هەر بەپێی ڕاگەیەندراوەکەی وەزارەتی بازرگانی و پیشەسازی، کۆی گشتی پارەی شایستەی جووتیاران نزیکەی (٥٩٠) ملیار دینارە و لەو بڕەش تا ئێستا ٧٤ ملیار و ٥٠٠ ملیۆن دیناری گەیشتووە و بەم شێوە بەسەر جووتیاران دابەش کراوە:
سلێمانی؛ بڕی (٢٨) ملیار دینار.
هەولێر؛ بڕی (١٧) ملیار دینار.
دهۆک؛ بڕی (٢٩،٥٠٠) ملیار دینار.
هاوکات، وەزارەتەکە دەڵێ، بڕی ٥١٥ ملیار دینار وەک شایستەی جووتیاران ماوە و چاوەڕوان دەکرێت “لە ئایندەیەکی نزیکدا بخرێتە سەر هەژماری بانکی وەزارەتمان و پاش تەواوکردنی ڕێکارە ئیدارییەکان بەسەر جووتیاران دابەش بکرێت”.
