وەزیری كارەبا و وەزیری سامانە سروشتییەكان (بەوەكالەت) لە ڕاگەیەندراوێکدا ئەمڕۆ شەممە، ٢٧ی نیسانی ٢٠٢٤، ڕایگەیاند، تیمەكانی وەزارەتی كارەبا و وەزارەتی سامانە سروشتییەكان و لایەنە پەیوەندارەكانی دیكە، پاش هێرشە درۆنییەكەی سەر كێڵگەی كۆرمۆر توانیویانە قەرەبووی بەشێکی زۆری زیانەکانی کەمبوونەوەی ٢٥٠٠ مێگاواتی بەرهەمهێنانی کارەبا بکەنەوە و ئاستی بەرهەمهێنانی کارەبا بگەیەننە ١٦٠٠ مێگاوات.
هەر لە ڕاگەیەندراوەکەدا هاتووە، تیمەکانی لایەنە پەیوەندیدارەکان “ماندوونەناسانە بە درێژایی شەوی ڕابردوو تا ئێستا بۆ كەمكردنەوەی شوێنەوارەكانی هێرشەكە و بە پلانێكی تۆكمە قەرەبووی بەشێکی زۆری كەمبوونەوەی بەرهەمهێنانی كارەبایان کردووەتەوە و ڕێگایان نەدا كوژانەوەی گشتی لە سیستەمی كارەبا ڕووبدات”.
زیاتر دەڵێ: “ئێستا وەزارەتی كارەبا لە چاوەڕوانی چارەسەركردنی شوێنەوای هێرشەكە و دەستپێكردنەوەی پەستانی گازدایە بۆ هەرسێ وێستگەی هەولێر و سلێمانی و بازیان و ئاسایبوونەوەی دۆخەكە”.
ئێوارەی دوێنێ هەینی، ٢٦ی نیسان، بە درۆن هێرشکرایە سەر کێڵگەی گازی کۆرمۆر لە سنوری شارەدێی قادرکەرەمی سەربە شارۆچکەی چەمچەماڵ و بەهۆیەوە ناردنی گاز بۆ وێستگەکانی بەرهەمهێنانی کارەبای هەرێمی کوردستان وەستا. حکوومەتی هەرێمی کوردستان ڕایگەیاند، هێرشەکە بووەتە هۆی کەمبوونەوەی بڕی ٢٥٠٠ مێگاوات کارەبای هەرێمی کوردستان.
