دادگای باڵای فیدڕاڵیی عێراق پێوەست بە داوای تایبەت بە سێ مووچەی فەرمانبەرانی هەرێمی کوردستان لە ٢٠٢٣دا، ڕەتیکردەوە بڕیاری لەسەر بدات و ڕایگەیاند، بابەتەکە لە تایبەتمەندییەکانی دادگەکەدا نییە.
ئەمڕۆ سێشەم، ٢١ی ئایاری ٢٠٢٤، دادگای باڵای فیدڕاڵیی عێراق لە دانیشتنی خۆیدا و لەسەر ئەو سکاڵایەی پێشتر لەلایەن چەند هاووڵاتییەکی هەرێمی کوردستان بەمەبەستی بڕیاردان لەسەر خەرجکردنی سێ مووچەی ساڵی ڕابردووی فەرمانبەرانی هەرێمی کوردستان تۆمارکرابوو، ڕەتی کردەوە بڕیار لەسەر داواکە بدات بەپاساوی ئەوەی بابەتەکە لە تایبەتمەندییەکانی دادگای فیدڕاڵی نییە.
