ئەنجوومەنی وەزیرانی هەرێمی کوردستان بۆ تاوتوێکردنی چەند پرسێکی تایبەت بە مووچەی فەرمانبەرانی مەدەنی و سەربازی و خانەنشینان کۆدەبێتەوە.
بەگوێرەی ڕاگەیەندراوی حکوومەتی هەرێمی کوردستان، ئەمڕۆ چوارشەم ٣ی تەمووزی ٢٠٢٤ لە کۆبوونەوەی ئاسایی ئەنجوومەنی وەزیراندا تاوتوێیی پرسەکانی پێوەست بە هاوتاکردنی مووچەی خانەنشینانی هەرێمی کوردستان لەگەڵ هاوتاکانیان لە حکوومەتی فیدڕاڵی، بەگوێرەی یاسای یەکگرتووی خانەنشینیی ژمارە (٩)ی ساڵی ٢٠١٤ دەکرێت.
لە تەوەرێکی دیکەی کۆبوونەوەکەدا، ئەنجوومەنی وەزیران، بەدواداچوون بۆ مووچەی مانگی (٦)ی مووچەخۆرانی هەرێم و مووچەی مانگی (٥) و (٦) ی هێزەکانی پێشمەرگە و ئاسایش و دواپێشهاتی بابەتی وردبینی و پێداچوونەوە بە لیستی مووچەی هێزەکانی پێشمەرگە دەکات.
لە بڕگەی سێیەمی کۆبوونەوەکەشدا، دەرەنجامی کۆبوونەوەی هاوبەشی هەردوو حکوومەتی هەرێم و حکوومەتی فیدڕاڵی، سەبارەت بە دەروازە سنوورییەکان کە لە ڕێککەوتی ١ی تەمووزی ٢٠٢٤ ئەنجام درا، تاوتوێ دەکرێت.
