هێزێکی حەشدی شەعبی دەستیان بەسەر کێڵگەیەکی گازدا گرت، کە کۆمپانیای هیلالی ئیماراتی بەمەبەستی پەرەپێدان گرێبەستی لەسەر کردووە.
بەرەبەیانی ئەمڕۆ یەکشەم، ٢٥ی ئابی ٢٠٢٤، هێزێکی گەورەی حەشدی شەعبی، کە بەپێی سەرچاوەکانی زێدپرێس لە نزیکەی سێ هەزار چەکدار و زیاتر لە ٢٠٠ هەمەر، ئۆتۆمبێل، شۆفڵ و ئامێری دیکەی سەربازی پێکهاتوون، دەستیان بەسەر کێڵگەیەکی گاز لە سنوری شارەدێی کوڵەجۆ(کۆکس) لە دەڤەری گەرمیاندا گرت.
کێڵگەکە، پێشتر بەگرێبەست بە کۆمپانیای هیلالی ئیماراتی دراوە، بۆ پەرەپێدان و بەرهەمهێنانی گاز تیایدا و تا ئێستا لەلایەن پۆلیسی نەوت و گازی سەربە وەزارەتی ناوخۆی حکوومەتی هەرێمی کوردستانەوە پارێزگاری کراوە.
ناوچەکە، پێشتر لە چوارچێوەی سیاسەتی بەعەرەبکردن، لەلایەن ڕژێمی بەعسەوە گۆڕانکاری کارگێڕی بەسەردا هێنراوە و لە کفرییەوە خراوەتە سەر خانەقین و لەدوای ٢٠٠٣یشەوە، وەک بەشێک لە ئیدارەی سەربەخۆی گەرمیان مامەڵەی لەگەڵ کراوە.
