هاووڵاتییەک لە خۆپیشاندانەکەی سنووری وەرتێ بە گولەی ئەندامانی هێزە ئەمنییەکان کوژرا و سێ هاووڵاتی دیکەیش بریندار بوون.
شەوی ١٣/١٤ی تەمووزی ٢٠٢٥، ژمارەیەک لە دانیشتووانی سنووری ناحیەی وەرتێ و باڵەکایەتی، لە سەر پردی حافیز لە ڕێگەی هامڵتۆن، لە بەرانبەر نەبوونی کارەبا، دەستیان بە خۆپیشاندان کرد و ڕێگەکەیان گرت.
هێزە ئەمنییەکان بۆ بڵاوەپێکردنی خۆپیشاندەران گەیشتنە شوێنەکە و تەقەیان بەسەر خۆپیشاندەراندا کرد. بەگوێرەی چەندین وێنە و ڤیدیۆی تایبەت کە لەلایەن خۆپیشاندەرانەوە گیراون و دەست زێدپرێس کەوتوون، لەناو ئەندامانی هێزە ئەمنییەکاندا، پەلاماردانی خۆپیشاندەران بەڕوونی دەرکەوتووە.
لەئەنجامی ئەو گرژی و ئاڵۆزییەدا، هاووڵاتییەکی سنوورەکە بەناوی “حەسەن ڕەحمان” بە گولەی ئەندامانی هێزە ئەمنییەکە کوژرا.
کەسوکاری قوربانییەکە و ژمارەیەک لە دانیشتووانی دەڤەرەکە، بەناوی ئەنجوومەنی باڵەکایەتییەوە، کۆنگرەیەکی ڕۆژنامەوانیان ساز کرد و جەختیان لەسەر ئەوە کردەوە، کە بکوژەکە ناسراوە و هەڕەشەی ئەوەیان کرد کە ئەگەر حکوومەت و لایەنە پەیوەندیدارەکان بەزوویی لێپچینەوە نەکەن و تاوانبار ڕادەست نەکرێت، ئەوان بە ڕێگەی خۆیان “تۆڵە” دەکەنەوە.
دوای ڕۆژێک لە ڕووداوەکە، وەزارەتی ناوخۆی حکوومەتی هەرێمی کوردستان ڕاگەیەندراوێکی بڵاوکردەوە و گوتی: “بەهۆی گردبوونەوە و خۆپیشاندانی بەشێک لە هاووڵاتییان لە سنوری ناحیەی وەرتی/ ئیدارەی سۆران، لە ئەنجامی گرژیدا هاووڵاتییەک بەناوی حەسەن ڕەحمان بووەتە قوربانی”.
وەزارەتی ناوخۆ دەڵێ: “دەستبەجێ لایەنە پەیوەندیدارەکان ڕاسپێردراون بۆ لێکۆڵینەوە و گرتنەبەری ڕێکاری یاسایی”.
وەزارەتەکە هاووڵاتییان و کەسوکاری قوربانییەکە دڵنیا دەکاتەوە کە “مافی هەموو لایەک پارێزراو دەبێت و لە دادگا ڕێکاری یاسایی جێبەجێ دەکرێت”.
