زێدپرێس
ئەمڕۆ دووشەم ١٤ی ئابی ٢٠٢٣، ئاریان ئەحمەد مستەفا گوتەبێژی وەزارەتی کار و کاروباری کۆمەڵایەتی، ڕوونکردنەوەیەکی لەمەڕ دەنگۆی سزادانی کوێستان محەمەد وەزیری کار و کاروباری کۆمەڵایەتی لەلایەن سەرۆکی حکوومەتەوە ڕەت کردەوە.
ڕوونکردنەوەکەی گوتەبێژی وەزارەتی کار، بەدوای بڵاوبوونەوەی دەنگۆیەک لە هەندێک ماڵپەڕ و هەژماری تۆڕەکانی کۆمەڵایەتی دێت، کە باسیان لەوە دەکرد، وەزیری کار لەلایەن سەرۆکی حکوومەتەوە سزا دراوە.
ئاریان محەمەد لەوبارەیەوە دەڵێ “بەداخەوە چەند پەیج و سایتێک وایان بڵاو کردۆتەوە، کە بەڕێز سەرۆکی حکوومەت سزای وەزیری کار و کاروباری کۆمەڵایەتی دابێت، ئەم هەواڵە دوورە لە ڕاستییەوە و ھیچ بنەمایەکی نییە”.
زیاتر دەڵێ “جەنابی وەزیر بە فەرمی مۆڵەتی وەرگرتووە و لە پشوودایە، کە مۆڵەتەکەی تەواو بوو، دێتەوە بۆ دەوامی ئاسایی خۆی”.
بڵاوبوونەوەی دەنگۆی سزادانی کوێستان محەمەد وەزیری کار و کاروباری کۆمەڵایەتی حکوومەتی هەرێم، دوای ئەوە دێت، کە دوێنێ یەکشەم ئاوات شێخ جەناب وەزیری دارایی و ئابووری حکوومەتی هەرێم وەک وەزیری کار و کاروباری کۆمەڵایەتی بە وەکالەت، لەگەڵ بەرپرسانی وەزارەتی کار و کاروباری کۆمەڵایەتی کۆبوونەوە.
